(भारत):उत्तर प्रदेशको फतेहपुर स्थित खगा कोतवाली क्षेत्रको एक गेस्ट हाउसमा बुधबार राति एउटा यस्तो घटना घट्यो, जसका कारण कुकुर भुकेकै निहुँमा एउटा भव्य विवाह समारोह रणभूमिमा परिणत भयो। प्रयागराजबाट आएको बेहुलीको परिवार र बेहुला सुमित केसरवानीको परिवार बीच भव्य रूपमा विवाहको कार्यक्रम चलिरहेको थियो।
रोचक कुरा के छ भने, यो जोडी पहिले नै प्रेम सम्बन्धमा थियो र उनीहरूले केही समयअघि कानपुरको एक मन्दिरमा भागेर विवाह गरिसकेका थिए। परिवारको सहमति पछि सोही सम्बन्धलाई सामाजिक र औपचारिक रूप दिन फतेहपुरमा पुन: रीतिरिवाज अनुसार विवाह आयोजना गरिएको थियो।
विवाहका सुरुवाती रस्महरू शान्तिपूर्ण रूपमा सम्पन्न भए तापनि बिहानको करिब ४ बजेतिर मण्डपमा पूजा चलिरहँदा विवादको बीजारोपण भयो। बेहुलीको परिवारले आफूसँगै ल्याएको घरपालुवा कुकुर मण्डप भन्दा केही पर बाँधिएको थियो, जो अचानक भुक्न थाल्यो।
कुकुरको आवाजबाट झर्किएका बेहुला पक्षका एक युवकले कुकुरलाई निर्दयीपूर्वक कुटपिट गरेपछि बेहुली पक्षले त्यसको कडा प्रतिवाद गर्यो। हेर्दाहेर्दै यो सामान्य भनाभन हिंसात्मक झडपमा परिणत भयो र मण्डपमा कुर्सी तथा लाठी-मुङ्ग्री चल्न थाल्यो। यस खूनी संघर्षमा बेहुली पक्षका तीन जनाको टाउकोमा गम्भीर चोट लाग्यो भने बेहुला पक्षका केही व्यक्तिहरू पनि सामान्य घाइते भए।
घटनाको जानकारी पाउनेबित्तिकै प्रहरी टोली घटनास्थल पुग्यो र चलिरहेको विवाहको रस्मलाई रोकिदियो। घाइतेहरूलाई उपचारका लागि अस्पताल पठाइयो र भोलिपल्ट दुवै पक्ष प्रहरी चौकीमा उपस्थित भए। प्रहरी चौकीमै बसेको पञ्चायतका क्रममा बेहुलीले कठोर निर्णय लिँदै यस्तो हिंस्रक र जनावरप्रति निर्दयी परिवारमा आफू विवाह गरेर नजाने स्पष्ट पारिन्।
बेहुलीको अडान पछि दुवै पक्षबीच लेनदेन भएका उपहार र नगद फिर्ता गर्ने सहमति भयो र कुनै औपचारिक उजुरी नगरी मामला सामसुम पारियो। कुकुरकै कारण विवाह टुटेको यो अनौठो खबर अहिले सामाजिक सञ्जालमा चर्चाको विषय बनेको छ, जहाँ मानिसहरूले बेहुलीको निर्णयलाई समर्थन र विरोधमा विभिन्न प्रतिक्रिया दिइरहेका छन्।
आफ्नो प्रतिकृया दिनुहोस्