२३ फागुन,एजेन्सि: संयुक्त अरब इमिरेट्स (यूएई) को दुबईमा क्षेत्रीय सुरक्षा तनावका बीच आकाशमा रोकिएका हवाई आक्रमणका अवशेष खस्दा एक सामान्य घटना भएको पुष्टि गरिएको छ । तर दुबईका अधिकारीहरूले स्थिति पूर्ण रूपमा नियन्त्रणमा रहेको बताएका छन् ।
दुबई मिडिया अफिसले सामाजिक सञ्जाल ‘एक्स’ मार्फत जारी गरेको वक्तव्यमा हवाई प्रतिरक्षा प्रणालीले आक्रमणलाई रोके पछि खसेको अवशेषका कारण सानो घटना भएको उल्लेख गर्दै कुनै पनि व्यक्तिलाई चोटपटक नलागेको स्पष्ट पारेको छ । साथै सामाजिक सञ्जालमा फैलिएका दुबई अन्तर्राष्ट्रिय विमानस्थलमा कुनै घटना भएको भन्ने हल्ला पनि असत्य भएको बताइएको छ ।
यो घटना मध्यपूर्व क्षेत्रमा पछिल्लो समय बढ्दो सुरक्षा तनाव बीच भएको हो । शनिबार बिहान साउदी अरबको रक्षा मन्त्रालयका अनुसार साउदी वायु प्रतिरक्षा प्रणालीले देशको रणनीतिक शायबह तेल क्षेत्रतर्फ लक्षित नयाँ हवाई आक्रमण प्रयासलाई निष्क्रिय बनाएको छ ।
रक्षा मन्त्रालयका प्रवक्ता मेजर जनरल तुर्की अल–मालिकीले चार अलग–अलग चरणमा प्रक्षेपण गरिएका १६ वटा ड्रोन ‘इन्टरसेप्ट’ गरी नष्ट गरिएको जानकारी दिएका छन् । ती ड्रोनहरू महत्वपूर्ण ऊर्जा संरचना तर्फ लक्षित गरी पठाइएको बताइएको छ ।
यसका साथै अल–खार्जस्थित प्रिन्स सुल्तान एयर बेस तर्फ प्रक्षेपण गरिएको एक ब्यालिस्टिक मिसाइल र एक क्रुज मिसाइल पनि वायु प्रतिरक्षा प्रणालीले खसालिदिएको मन्त्रालयले जनाएको छ । रियादको पूर्वी क्षेत्रमा उडि रहेको अर्को ड्रोन पनि ध्वस्त पारिएको छ । रियादबाट करिब ८० किलोमिटर टाढा रहेको अल–खार्ज क्षेत्र माथि लगातार तेस्रो दिन पनि आक्रमणको प्रयास भएको बताइएको छ । उक्त क्षेत्र साउदी अरबको प्रमुख औद्योगिक केन्द्रमध्ये एक हो ।
शायबह तेल क्षेत्र माथि भएको यो प्रयास फेब्रुअरी २८ यता पहिलो हो । सो समय देखि अमेरिका र इजरायलले इरान विरुद्ध ठूलो हवाई अभियान सुरु गरे पछि क्षेत्रीय तनाव तीव्र बनेको छ । त्यसको प्रतिक्रिया स्वरूप इरानले खाडी क्षेत्रका विभिन्न औद्योगिक तथा ऊर्जा पूर्वाधारलाई लक्षित गर्दै आक्रमणको प्रयास गरिरहेको बताइएको छ ।
रुब अल–खाली मरुभूमिको गहिराइमा रहेको शायबह तेल क्षेत्र साउदी अरबको ‘सुपर–जायन्ट’ तेल क्षेत्रमध्ये एक मानिन्छ । यहाँको अत्याधुनिक प्रशोधन संयन्त्रले पेट्रोकेमिकल उद्योगका लागि प्राकृतिक ग्यास तरल पदार्थ (एनजीएल) आपूर्ति गर्ने महत्वपूर्ण भूमिका खेल्छ ।
पछिल्लो २४ घण्टाभित्र मात्र यूएईले १२५ भन्दा बढी ड्रोन र ६ वटा ब्यालिस्टिक मिसाइल रोकेको जनाएको छ । त्यस्तै शुक्रबार साउदी अरबले प्रिन्स सुल्तान एयर बेसतर्फ लक्षित पाँच मिसाइल र रियाद तथा अल–खार्ज क्षेत्रमा पठाइएका धेरै ड्रोन पनि नष्ट गरेको थियो ।
यी आक्रमण प्रयासहरूको अन्तर्राष्ट्रिय समुदायले कडा आलोचना गरेको छ । अरब लिग र इस्लामिक सहयोग संगठन (ओआईसी) ले पनि यस घटनाप्रति चिन्ता व्यक्त गरेका छन् । मार्च १ मा रियादमा बसेको खाडी सहयोग परिषद् (जीसीसी) का विदेशमन्त्रीहरूको आपतकालीन बैठकले सदस्य राष्ट्रहरूलाई आफ्नो भू–भागको रक्षा गर्ने पूर्ण अधिकार रहेको जनाएको थियो । त्यसपछि मार्च ३ मा साउदी युवराज मोहम्मद बिन सलमानको अध्यक्षतामा बसेको मन्त्रिपरिषद् बैठकले देशको सुरक्षा, नागरिक र पूर्वाधार जोगाउन आवश्यक सबै कदम चालिने स्पष्ट पारेको छ ।
आफ्नो प्रतिकृया दिनुहोस्