१४ असोज,असोज कृष्ण चतुर्थी,जनकपुरधाम ।नेपाल रेडक्रस सोसाइटी धनुषा शाखाका सभापति पंकज कुमार महतोको जिम्मेवारी थपिएको छ। नेपाल रेडक्रस सोसाइटी केन्द्रीय कार्यालयले महतोलाई जनकपुरधाम स्थित जानकी आँखा अस्पतालको व्यवस्थापन तथा सञ्चालनको समेत जिम्मेवारी दिएको हो।
केन्द्रीय कार्यालयले २०८३ असोज १४ गते महतोलाई पठाएको पत्र मार्फत अस्पतालको व्यवस्थापन तथा सञ्चालनलाई व्यवस्थित र प्रभावकारी रूपमा अघि बढाउन उनलाई जिम्मेवारी प्रदान गरिएको जनाएको छ। पत्रमा अन्य व्यवस्था नभए सम्मका लागि महतोलाई अस्पतालको जिम्मेवारी सम्हाल्न भनिएको छ।
धनुषा रेडक्रसको नेतृत्व गरिरहेका महतोले अब अस्पतालको सेवा प्रवाहलाई निरन्तरता दिने, व्यवस्थापनलाई प्रभावकारी बनाउने तथा आवश्यक प्रशासनिक र व्यवस्थापकीय समन्वय गर्ने जिम्मेवारी समेत सम्हाल्ने छन्।
केन्द्रीय कार्यालयको पत्रमा अस्पतालको व्यवस्थापकीय तथा आवश्यक समन्वय सम्बन्धी कार्य अघि बढाउन महतोलाई अनुरोध गरिएको छ। अस्पतालको सेवा प्रवाहमा निरन्तरता कायम राख्दै संस्थाको नीति, नियम तथा प्रचलित व्यवस्था अनुसार कार्यसम्पादन गर्न पनि पत्रमार्फत भनिएको छ।
अस्पतालसँग सम्बन्धित महत्वपूर्ण निर्णय तथा विषयमा केन्द्रीय कार्यालयसँग आवश्यक समन्वय गरेर अघि बढ्नु पर्ने उल्लेख गरिएको छ।
धनुषा रेडक्रसको नेतृत्वसँगै जानकी आँखा अस्पतालको व्यवस्थापनको जिम्मेवारी पाए सँगै महतोको संस्थागत भूमिका थप फराकिलो बनेको छ। अस्पतालको सेवा व्यवस्थापन र सञ्चालनलाई थप प्रभावकारी बनाउँदै सेवाग्राहीलाई सहज स्वास्थ्य सेवा उपलब्ध गराउने जिम्मेवारी अब उनको नेतृत्वमा अघि बढ्नेछ।
आफ्नो प्रतिकृया दिनुहोस्