७ चैत्र,काठमाडौं: नेपाली कांग्रेसको पेशागत तथा बुद्धिजीवी विभाग तथा नेपाल डेमोक्रेटिक लयर्स एशोसियसनले संविधान संशोधन सम्बन्धी सातै प्रदेशमा आयोजना गरेका अन्तरक्रियामा नेपाललाई धर्मनिरपेक्ष राष्ट्रको सट्टा हिन्दू राष्ट्र बनाउनुपर्ने सुझाव प्राप्त भएको छ।
देशभर आयोजित अन्तरक्रियामा सहभागीहरूले संविधान संशोधन गरी हिन्दू राष्ट्र पुन:स्थापना गर्नु पर्ने, साथै नेपालमा राजसंस्थालाई कुनै न कुनै रूपमा स्थान दिनु पर्ने माग राखेका थिए। कांग्रेसको उक्त विभागले यी सुझाव समेटिएको प्रतिवेदन बुधबार पार्टी सभापति शेरबहादुर देउवा लाई बुझाएको छ।
संविधान संशोधनका लागि प्रमुख सुझावहरू
बुधबार सानेपामा आयोजित कार्यक्रममा पेशागत तथा बुद्धिजीवी विभाग प्रमुख डा. डिला संग्रौला पन्तले प्रतिवेदन सभापति देउवालाई हस्तान्तरण गरिन्। प्रतिवेदनमा निम्न सुझावहरू समेटिएका छन्:
- धर्म निरपेक्षता खारेज गरी नेपाललाई हिन्दू राष्ट्र बनाउने।
- प्रतिनिधि सभा र प्रदेश सभामा प्रत्यक्ष निर्वाचित प्रणाली मात्र राख्ने।
- संविधानको प्रस्तावनामै हिन्दू राष्ट्र उल्लेख गर्ने।
- संघीयतालाई बलियो बनाउन प्रतिनिधि सभामा १६५ जना मात्र प्रत्यक्ष निर्वाचित हुने व्यवस्था गर्ने।
- प्रतिनिधि सभा र प्रदेश सभाबाट समानुपातिक निर्वाचन प्रणाली हटाउने र राष्ट्रिय सभालाई पूर्ण समानुपातिक प्रणालीमा लैजाने।
- प्रतिनिधि सभालाई समावेशी बनाउन महिलाहरूका लागि छुट्टै निर्वाचन क्षेत्र तोक्ने, थ्रेसहोल्डको प्रतिशत बढाउने।
- राष्ट्रिय सभामा दलित र महिलाका लागि ३३ प्रतिशत आरक्षण व्यवस्था गर्ने।
- स्थानीय तहको संख्या घटाउने र जिल्ला समन्वय समिति खारेज गर्ने।
- निर्वाचन क्षेत्र निर्धारणमा जनसंख्याका साथै भूगोललाई पनि आधार बनाउने।
- स्थानीय तहमा प्रमुख र उपप्रमुखमध्ये एक जना महिला अनिवार्य रूपमा सुनिश्चित गर्ने।
- राज्यका हरेक निकायमा महिलाको प्रतिनिधित्व ५० प्रतिशत पुर्याउने।
- ७० वर्ष पुगेका व्यक्तिहरूलाई जनप्रतिनिधि बन्न नपाउने व्यवस्था गर्ने।
- जनप्रतिनिधि बन्न कम्तीमा एसएलसी (प्रवेशिका) उत्तीर्ण गरेको हुनुपर्ने।
- निर्वाचित जनप्रतिनिधिलाई सरकारी तलब तथा सेवा सुविधा नदिने।
संविधान संशोधन आवश्यक: सभापति देउवा
प्रतिवेदन ग्रहण गर्दै पार्टी सभापति शेरबहादुर देउवाले हालको संविधानअनुसार कुनै पनि दललाई बहुमत ल्याउन कठिन हुने बताए। त्यसैले समय अनुसार संविधान संशोधन आवश्यक रहेको उनको भनाइ थियो।
विभाग प्रमुख संग्रौलाले सातै प्रदेशमा कार्यक्रम गरेर सुझाव संकलन गरी प्रतिवेदन तयार गरिएको बताइन्। उनले भनिन्, “हामीले सातै प्रदेशबाट प्राप्त सुझाव संकलन गरी पार्टी सभापतिलाई बुझाएका छौं। यसले संविधान संशोधन बारे पार्टीको धारणा बनाउन मदत गर्नेछ।”
नेपालको संविधानमा सुधार आवश्यक रहेको भन्दै सातै प्रदेशमा कार्यक्रम गरेर पार्टी लाई प्रतिवेदन बुझाउने पहिलो विभाग कांग्रेसको पेशागत तथा बुद्धिजीवी विभाग बनेको छ।
आफ्नो प्रतिकृया दिनुहोस्