१७ माघ,सुर्खेत : राष्ट्रिय स्वतन्त्र पार्टी (रास्वपा) ले कर्णाली प्रदेशमा आफ्नो चुनावी अभियानलाई सघन बनाएको छ। आगामी फागुन २१ गते हुने प्रतिनिधिसभा सदस्यको निर्वाचनलाई लक्षित गर्दै पार्टीका वरिष्ठ नेता बालेन शाह नेतृत्वको टोली आज सुर्खेत पुगेको हो।
पार्टीको साङ्गठनिक सुदृढीकरण र चुनावी रणनीति तय गर्न सुर्खेत आइपुगेका नेता शाहले यहाँ स्थित विभिन्न निर्वाचन क्षेत्रका उम्मेदवार तथा प्रदेश तहका नेताहरू सँग भेटघाट गरेका छन्।नेता बालेनले सुर्खेत क्षेत्र नम्बर १ का प्रतिनिधिसभा उम्मेदवार टेकबहादुर सिंह ठकुरी र क्षेत्र नम्बर २ का उम्मेदवार रमेश सापकोटासँग छुट्टा-छुट्टै भेट गरी चुनावी तयारी बारे जानकारी लिएका थिए।
सो अवसरमा कर्णाली प्रदेश सभापति मदन खड्का लगायतका केन्द्रीय तथा प्रदेश स्तरका नेताहरूको उपस्थिति रहेको थियो।
भेटघाटका क्रममा नेता शाहले रास्वपाको मुख्य एजेन्डा सुशासन, पारदर्शिता र जनउत्तरदायी व्यवस्था रहेको उल्लेख गर्दै जनताको विश्वास जित्न तल्लो तह सम्म पुग्नु पर्नेमा जोड दिए। उनले भने, “हाम्रो प्रतिस्पर्धा केवल मतका लागि मात्र नभई व्यवस्था परिवर्तन र नागरिकको जीवनस्तर सुधारका लागि हो।”
रास्वपाले कर्णालीमा पछिल्लो समय निम्न रणनीतिहरू अवलम्बन गरेको छ:
क)प्रत्यक्ष संवाद: मतदाताका गुनासा सुन्नका लागि टोल-टोलमा पुग्ने।
ख)घरदैलो अभियान: उम्मेदवार सहितको टोलीले घर-घरमा पुगेर पार्टीको घोषणा-पत्र बुझाउने।
ग)सार्वजनिक सुनुवाइ: स्थानीय मुद्दाहरूमा केन्द्रित रहेर सार्वजनिक बहस सञ्चालन गर्ने।
कर्णालीका विभिन्न जिल्लामा चुनावी अभियानलाई तीव्र बनाएको रास्वपाले यसपटकको निर्वाचनमा नयाँ शक्ति र वैकल्पिक राजनीतिको पक्षमा जनलहर आउने दाबी गरेको छ। नेता बालेनको सुर्खेत आगमनलाई स्थानीय राजनीतिमा अर्थपूर्ण रूपमा हेरिएको छ।
आफ्नो प्रतिकृया दिनुहोस्