२३ बैशाख,जनकपुरधाम : नेकपा (एमाले) धनुषा जिल्ला अधिवेशन निर्वाचन प्रक्रियामा प्रवेश गर्ने क्रममा गम्भीर विवाद उत्पन्न भएको छ। निर्वाचन समितिले मंगलबारका लागि निर्वाचन कार्यतालिका सार्वजनिक गर्दै सम्पूर्ण तयारी पूरा गरिसकेको थियो। तर, अन्तिम मतदाता नामावली सार्वजनिक भए पछि एक पक्षले समिति माथि पक्षपात र धाँधलीको आरोप लगाउँदै कडा विरोध जनाए पछि अधिवेशन स्थल तनावग्रस्त बनेको हो।
विवाद उत्कर्षमा पुगे पछि अधिवेशन स्थलमा कुर्सी हानाहानको स्थिति उत्पन्न भयो। आक्रोशित कार्यकर्ताहरूले निर्वाचन समितिको निर्णय प्रति असन्तुष्टि जनाउँदै कुर्सी प्रहार गरेका थिए। प्रत्यक्षदर्शीका अनुसार कुर्सी प्रहारको क्रममा वर्तमान अध्यक्ष राजकिशोर यादव समेत लक्षित भएका छन्, यद्यपि यसबारे औपचारिक पुष्टि भने हुन बाँकी छ।
दुई उम्मेदवार बीच अध्यक्ष पदको प्रतिस्पर्धा
अध्यक्ष पदका लागि भोला यादव र लक्ष्मी नारायण यादव बीच प्रतिष्पर्धा भइरहेको छ। सोमबार राति सम्म उम्मेदवारी दर्ता सम्पन्न भइसकेको थियो। तर, अन्तिम मतदाता नामावलीमा केही नामहरू हटाइएको र केही नयाँ थपिएको भन्दै असन्तुष्टि चुलिएको हो।
पाँच पदाधिकारी र १३५ सदस्य चयन हुने
जिल्ला अधिवेशन बाट अध्यक्ष, उपाध्यक्ष, सचिव, उपसचिव, महिला उपसचिव सहित १३५ सदस्यीय जिल्ला कमिटी चयन गरिनेछ। हाल पार्टी भित्र महासेठ समूह र मण्डल–अरगरिया–झा समूह बीच गुटगत प्रतिस्पर्धा तीव्र देखिएको छ। दुबै पक्षले प्यानल बनाएर उम्मेदवारी दर्ता गराएका छन्।
पार्टी भित्र बाटै सक्रिय र योगदान दिएका युवा कार्यकर्ताहरूलाई सदस्यताबाट बञ्चित गरिएको गुनासो उठ्दै आएको छ, जसले आन्तरिक लोकतन्त्र र नेतृत्व चयन प्रक्रतिको विश्वसनीयता माथि प्रश्न उठाएको छ।
निर्वाचन समितिको मौनता
निर्वाचन समितिका पदाधिकारीहरू भने अहिले सम्म यस विषयमा बोल्न तयार भएका छैनन्। विवाद समाधानका लागि प्रयास भइरहेको समितिस्रोतले जनाएको छ। स्थिति थप जटिल नहोस् भनेर सुरक्षा व्यवस्था पनि कडा बनाइएको छ।
आफ्नो प्रतिकृया दिनुहोस्