२४ वैशाख, काठमाडौं: प्रधानमन्त्री केपी शर्मा ओलीले वर्तमान समयमा सञ्चार-माध्यमहरू स्वतन्त्र रूपमा काम गरिरहेको बताउँदै सरकारको तर्फबाट कुनै दबाब, निर्देशन वा नियन्त्रण नरहेको स्पष्ट पारेका छन्।
बुधबार काठमाडौंमा आयोजित गोरखापत्र संस्थानको १२५औं वर्ष प्रवेश तथा ६३औं वार्षिकोत्सव समारोहमा बोल्दै प्रधानमन्त्री ओलीले विगतमा पत्रकारहरू स्वतन्त्र रूपमा लेख्न नपाउने अवस्था रहेको स्मरण गरे। तर अहिलेको परिवेशमा मिडिया लाई पूर्ण स्वतन्त्रता प्राप्त रहेको दाबी गरे।
उनले भने, “गोरखापत्रले धेरै उतार-चढाव देखेको छ। पहिले सम्पादकीय लेख्न निकै गाह्रो थियो। आज तपाईंहरू स्वतन्त्र रूपमा जे मन लाग्छ लेख्न सक्नुहुन्छ। प्रधानमन्त्री वा सरकार बाट कुनै दबाब, निर्देशन वा संकेत आएको छैन। आँखा झिम्काउने सम्म गरिएको छैन।”
प्रधानमन्त्री ओलीले डिजिटल प्रविधिको विस्तार सँगै छापा माध्यमको भूमिका घटेको भन्ने धारणा गलत भएको बताए। उनले गोरखापत्र जस्ता पत्रिकाहरूको महत्व अझै कायम रहेको उल्लेख गरे।
“कतिपयले भन्छन् कि अनलाइनको समयमा पत्रपत्रिकाको आवश्यकता छैन,” उनले भने, “तर डिजिटलमा सामग्री खोज्न र संग्रह गर्न कठिन हुन्छ। त्यसैले गोरखापत्रको सान्दर्भिकता अझै यथावत् छ र यो अझै रहिरहनेछ।”
आफ्नो प्रतिकृया दिनुहोस्