२५ वैशाख,काठमाडौं: जनकपुरधाम स्थित लक्ष्मण कुटीको नाममा रहेको खेलकुद मैदानमा हुने चलखेल विरुद्ध राष्ट्रिय स्वतन्त्र पार्टी (रास्वपा) का सांसद मनिष झाले कडा चेतावनी दिएका छन्।
प्रतिनिधि सभाको बिहीबारको बैठकमा बोल्दै सांसद झाले सो मैदानमा दलाल र विचौलियाको चलखेल भएको भन्दै यदि खेलाडीहरूको सपनामा कुनै अवरोध सिर्जना भयो भने आन्दोलनमा उत्रिने चेतावनी दिए।
उनका अनुसार सो १७ बिगाहा जमिनमा साढे दुई अर्ब लागतको अन्तर्राष्ट्रिय स्तरको रंगशाला निर्माणको डीपीआर (विस्तृत परियोजना प्रतिवेदन) समेत तयार भइसकेको छ। गुठी संस्थानको स्वामित्वमा रहेको जमिनमा खेलकुद परिषद्ले वार्षिक ९ लाख रुपैयाँ भाडा तिरेको भए पनि हाल त्यो रकम एक्कासि ४९ लाख ६० हजार रुपैयाँमा बढाइएको छ।
“हामीले नेपालमा खेलकुद मैदानका लागि आन्दोलन भएको इतिहासमा सुनेका छैनौं,” सांसद झाले भने, “तर अब जनकपुरमा त्यो इतिहास बन्नेछ। यदि कुनै पनि दलाल वा विचौलियाले यो परियोजनामा बाधा पुर्यायो भने हामी सशक्त आन्दोलन गर्नेछौं।”
उनले जनकपुरधामको खेलकुद विकासलाई लिएर कुनै पनि सम्झौता नहुने स्पष्ट संकेत दिएका छन्।
आफ्नो प्रतिकृया दिनुहोस्