२९ वैशाख,जनकपुर: जनता समाजवादी पार्टी (जसपा) नेपाल धनुषा जिल्ला अध्यक्षमा पुन: पशुपति यादव निर्वाचित भएका छन्। शनिबार देखि सुरु भएको प्रथम जिल्ला अधिवेशन अन्तर्गत आइतबार सम्पन्न मतदान बाट यादव दोस्रो कार्यकालका लागि अध्यक्षमा निर्वाचित भएका हुन्।
अध्यक्ष पदका लागि भएको प्रतिस्पर्धामा उनले आफ्ना निकटतम प्रतिद्वन्द्वी शत्रुधन यादवलाई ४ मतले पराजित गरे। पशुपति यादवले १६८ मत प्राप्त गर्दा शत्रुधन यादवले १६४ मत प्राप्त गरेका थिए।
अन्य निर्वाचित पदाधिकारीहरूमा उपाध्यक्ष पदमा शहीनगर नगरपालिकाका मेयर दिनेश प्रसाद यादव र ललित मण्डल विजयी भएका छन्। सचिवमा रामनारायण कापडी निर्वाचित भएका छन् भने उपसचिवमा राम विहारी यादव र शशिचन्द्र यादव विजयी भएका छन्।
कोषाध्यक्षमा सुजिता यादवले जित हासिल गरेकी छन्। मुस्लिम सदस्य तर्फ रहमत राइन, आमिन खान र नइम शेष निर्वाचित भएका छन्। यस अघि नै महिला तथा जनजाति सदस्यहरू निर्विरोध निर्वाचित भइसकेका छन्। खुला सदस्य तर्फको मतगणना भने जारी रहेको जनाइएको छ।
आफ्नो प्रतिकृया दिनुहोस्