“सुखी, समृद्ध जीवन्त सहर, बाल-विवाहमुक्त मटिहानी नगर” नारासहित रयाली सम्पन्न
११ असार,मटिहानी, (महोत्तरी) : “सुखी, समृद्ध जीवन्त सहर, बाल-विवाहमुक्त मटिहानी नगर” भन्ने मूल नाराका साथ मटिहानी नगरपालिका वडा नं.–७ द्वारा बालविवाह न्यूनीकरण सम्बन्धी जनचेतना मूलक रयाली कार्यक्रम सम्पन्न गरिएको छ। नगर प्रमुख हरि प्रसाद मण्डलको नेतृत्वमा आयोजित रयाली मटिहानी नगरको विभिन्न भागको परिक्रमा गर्दै बालविवाह जस्तो सामाजिक कुप्रथाको अन्त्यका लागि सशक्त सन्देश दिइएको थियो।
उक्त कार्यक्रममा मटिहानी नगरपालिकाका वडाध्यक्षहरु, कार्यपालिका सदस्यहरु, वडा सचिवहरु, नगरका कर्मचारीहरु, सुरक्षा निकायका प्रतिनिधिहरु, अभिभावक, विद्यार्थीहरु तथा स्थानीयवासीहरुको उल्लेखनीय सहभागिता रहेको थियो।
बालविवाह न्यूनीकरण तथा सामाजिक रुपान्तरणतर्फको महत्वपूर्ण पाइला मानिएको यस कार्यक्रममा स्थानीय तहको अग्रसरता र नेतृत्वले दीर्घकालीन सामाजिक परिवर्तन सम्भव हुने विश्वास दिलाएको छ।
कार्यक्रमबाट मटिहानी नगरपालिकामा निम्न लाभ र उपलब्धिहरु अपेक्षा गरिएको छ:बालबालिकाको भविष्यमा सुधार : समय भन्दा अगाडि विवाहका कारण पढाइ छुट्ने, स्वास्थ्यमा समस्या आउने अवस्थाबाट मुक्त गराउने।,शिक्षा क्षेत्रमा सुधार : विवाहलाई शिक्षाको अवरोध बन्न नदिने सन्देशले बालिका शिक्षामा उत्साह बढाउने।, महिला सशक्तीकरणमा टेवा : किशोरीहरुलाई आत्मनिर्भर बन्न समय, अवसर र समर्थनको वातावरण सिर्जना।,सामाजिक चेतनाको विस्तार : सहभागी समुदायका सदस्य मार्फत परिवार, छिमेक र समाजमा जनचेतना फैलाउने।,स्थानीय तहको पहिचान : मटिहानीलाई मधेश प्रदेशमै बालमैत्री र सचेत नगरको रूपमा स्थापित गर्न सहयोग।
रयालीको समापनमा नगर प्रमुख हरि प्रसाद मण्डलले सम्बोधन गर्दै भने, “बालविवाहको अन्त्य हाम्रो सामूहिक जिम्मेवारी हो। हामी बालबालिकालाई शिक्षित, सुरक्षित र सक्षम बनाउने प्रणका साथ अघि बढेका छौं। यस्ता जनचेतना कार्यक्रमहरु नगरको हरेक वडामा निरन्तर गरिनेछ।”
स्थानिय तहको सक्रियता र समुदायको सहभागिता बाट सुरु भएको यस्तो अभियानले मटिहानी नगरलाई बाल-विवाहमुक्त बनाउने दिशामा सार्थकता ल्याउने विश्वास गरिएको छ। यो कार्यक्रम रुढीवादी सोचको अन्त्य मात्र नभई, स्थानीय शासन प्रणालीले जनता सँग सिधा जोडिएको सामाजिक परिवर्तनको उदाहरण बनेको छ।
आफ्नो प्रतिकृया दिनुहोस्