३२ असार,काठमाडौं। खानेपानी, सिँचाइ तथा जलस्रोत मन्त्री प्रदीप यादवले तराई–मधेशमा दिन प्रतिदिन गहिरिँदै गएको खानेपानी संकटको तत्काल तथा दीर्घकालीन समाधान खोज्न विज्ञहरू सँग गम्भीर छलफल गरेका छन्।
आज काठमाडौँ स्थित खानेपानी मन्त्रालयमा आयोजित छलफलमा मन्त्री यादवले पर्सा जिल्लाको वीरगञ्ज महानगरपालिका लगायत तराई–मधेशका विभिन्न जिल्लामा जलवायु परिवर्तन, भू–जलको खस्कँदो स्तर, चुरे क्षेत्रको दोहन र अव्यवस्थित शहरीकरणका कारण उत्पन्न भएको खानेपानी अभावबारे विज्ञहरूसँग विस्तृत विचार–विमर्श गरेका हुन्।
छलफलमा पुल्चोक क्याम्पसका हाइड्रोजियोलोजिस्ट विज्ञहरूले भू–जल संकट, पानी पुनःभरणका उपाय, वर्षा पानी संकलन प्रणाली, हरित क्षेत्र विस्तार तथा वैकल्पिक स्रोतको पहिचानजस्ता विषयमा वैज्ञानिक विश्लेषण प्रस्तुत गरेका थिए। खानेपानी तथा ढल व्यवस्थापन विभागका महानिर्देशक ई. रामकुमार श्रेष्ठले छलफलमा आएका सुझाव र विश्लेषणहरू नीति निर्माणका लागि महत्त्वपूर्ण हुने जानकारी दिए।
मन्त्रालयका सहसचिव तथा योजना महाशाखा प्रमुख ई. कमलराज श्रेष्ठका अनुसार, छलफलमा सहभागी विज्ञहरूको सहमतिमा एक अध्ययन टोली गठन गर्ने निर्णय समेत गरिएको छ। उक्त टोलीले तराई–मधेश क्षेत्रको जल अवस्था, भू–जल संरचना, प्रदूषणको अवस्था तथा दीर्घकालीन समाधानका उपायहरूबारे विस्तृत अध्ययन गर्नेछ।
कार्यक्रममा खानेपानी मन्त्रालयका सचिव प्रमिलादेवी शाक्य बज्राचार्य, सहसचिव रामबाबु पुरी, मीना श्रेष्ठ, आयोजना प्रमुख सुरत बम, खानेपानी संस्थानका महाप्रवन्धक अर्जुनबाबु ढकाल, आयोजन निर्देशनालय प्रमुख लक्ष्मिप्रसाद उपाध्याय, भ्याली बोर्ड प्रमुख सञ्जिवीकृष्ण राणा, र पुल्चोक क्याम्पसका भूगर्भ विज्ञ भोला घिमिरे, देबी प्रसाद भट्टराई र प्रतापसिंह ताडबको पनि सहभागीता रहेको थियो।
मन्त्री यादवले तराई–मधेशमा खानेपानी संकट समाधान लाई सरकारको प्राथमिक एजेन्डाका रूपमा अघि बढाउने प्रतिवद्धता जनाउँदै, विज्ञहरूको सुझाव अनुसार योजनाबद्ध रुपमा समाधान तर्फ अघि बढ्ने बताएका छन्।
आफ्नो प्रतिकृया दिनुहोस्