१८ चैत,काठमाडौं ।श्रम, रोजगार तथा सामाजिक सुरक्षा मन्त्री दिपक साहले वैदेशिक रोजगारी सम्बन्धी गुनासा व्यवस्थापन चुनौतीपूर्ण रहेको बताएका छन्। उनले यसलाई समाधान गर्न सरकारभित्र समन्वय आवश्यक रहेको पनि जोड दिएका छन्।
बुधबार मन्त्रालयले अहिले सम्मका निर्णय र कार्यक्रमको समीक्षा गर्दै बोल्दै मन्त्री साहले वैदेशिक रोजगारी सँग सम्बन्धित गुनासा र ठगीका घटनाहरू मन्त्रालयका लागि सबैभन्दा ठूलो चुनौती भएको बताए।
मन्त्री साहले भने, “समाधान योजना अन्तर्गत सबैभन्दा ठूलो समस्या वैदेशिक रोजगारी सम्बन्धी गुनासाहरू हुन्। ठगीका घटनाहरू धेरै छन् र यसको व्यवस्थापन अत्यन्त चुनौती पूर्ण छ। यस विषयमा मैले विभागसँग पटक–पटक छलफल गरिसकेको छु।”
उनले यस बारे प्रधानमन्त्री बालेन शाह सँग पनि निरन्तर छलफल भइरहेको जानकारी दिए। उनले थपे, “हामी प्रधानमन्त्री सँग छलफल गरिरहेका छौं र कुन दिशामा जाने भन्ने बारे तादम्यता मिलाउनु आवश्यक छ। हामी समाधान कसरी गर्न सकिन्छ भन्नेमा केन्द्रित छौं।”
मन्त्री साहले मन्त्रालयमा रहेका फाइल र केसहरूको अवस्था बारे स्पष्टता अभाव रहेको पनि स्वीकार गरे। उनले भने, “धेरै फाइलहरू जलेका छन् भन्ने सुनेको छु। कसैले ४० हजार केस भन्छन्, कसैले ५० हजार, कसैले १८ हजार। यसमा धेरै भ्रम छ।”
आफू मन्त्री भएर आए पछि यथार्थ लुकाउन नचाहेको उनले बताए। “म मन्त्री भए पनि म तथ्य लुकाउन चाहन्नँ। अहिले ती केसहरूको वास्तविक अवस्था बुझ्ने क्रममा छु। हामी स्पष्ट छौं कि ती केसहरू कसरी घटाउन सकिन्छ भन्नेमा काम गर्नु पर्छ।”
मन्त्री साहले अवस्था विरोधाभास-पूर्ण रहेको स्वीकार्दै फाइल संकलनको काम भइरहेको जानकारी दिए। साथै, वैदेशिक रोजगारीमा रहेका कामदारहरूको अवस्थाबारे ट्र्याकिङ प्रणाली आवश्यक रहेको उल्लेख गर्दै भने, “को मान्छे कुन अवस्थामा छ भन्ने ट्र्याकिङको व्यवस्था हुनु पर्छ। मेरो अर्को प्राथमिकता अकुपेन्सनल हेल्थ र सेफ्टी हो।”
आफ्नो प्रतिकृया दिनुहोस्