९ साउन,काठमाडौं। काठमाडौं महानगरपालिकाले सार्वजनिक स्थानहरूमा धुम्रपान पूर्ण रूपमा निषेध गर्ने निर्णय गरेको छ। अब निजी सम्पत्ति बाहेकका कुनै पनि सार्वजनिक स्थानमा धुम्रपान गर्न नपाइने महानगरले स्पष्ट पारेको छ।
शुक्रबार आयोजित पत्रकार सम्मेलनमा नगर प्रहरी प्रमुख राजु पाण्डेले गत असार ३२ गते सम्पन्न नगरसभा बाट पारित निर्णय अनुसार साउन ९ गते देखि एक महिना सम्म व्यापक प्रचार-प्रसार गरिने र भदौ १ गते देखि नियम उल्लंघनकर्तालाई जरिवाना गर्न थालिने जानकारी दिए।
उनका अनुसार, सार्वजनिक स्थानमा पहिलो पटक धुम्रपान गर्दा ५ सय रुपैयाँ जरिवाना गरिनेछ भने दोहोरिएमा जरिवाना दुब्बर अर्थात् १ हजार रुपैयाँ हुने छ।
पाण्डेले भने, “महानगर भित्र सडक, पार्क, चोक, यातायात र प्रतीक्षालय लगायतका कुनै पनि सार्वजनिक स्थानमा धुम्रपान गर्न पाइने छैन। अब महानगरले यस नियमको प्रभावकारी कार्यान्वयन शुरु गर्दैछ।”
अनधिकृत पार्किङ गरे पनि जरिवाना
महानगरले धुम्रपानमात्र होइन, अनधिकृत पार्किङ नियन्त्रणमा समेत कडा कदम चालेको छ। पाण्डेका अनुसार तोकिएको स्थानबाहेक सवारी-साधन पार्किङ गर्दा निम्न जरिवाना तिराउनु पर्नेछ:
तीनपांग्रे सवारी (स्कूटर, बाइक): १,००० रुपैयाँ , चारपांग्रे सवारी (कार, जीप, भ्यान): २,५०० रुपैयाँ. मझौला सवारी (मिनीबस, मिनीट्रक): ३,५०० रुपैयाँ . ठूला सवारी (बस, ट्रक, लहरी): ५,००० रुपैयाँ
सार्वजनिक स्थलमा पोस्टर टाँस्नेलाई ५० हजार सम्म जरिवाना
सार्वजनिक स्थानमा पोस्टर, पम्प्लेट, स्टिकर टाँस्ने र प्रचार सामग्री वितरण गरी फोहोर गरेमा ५ हजार देखि ५० हजार रुपैयाँ सम्म जरिवाना गरिने व्यवस्था गरिएको छ। गल्ती दोहोरिएमा हरेक पटक जरिवाना दुब्बर गरिने निर्णय भएको पाण्डेले जानकारी दिए।
उनले जनचेतना अभिवृद्धि सँगै महानगरको नियम पालनामा सबै नागरिकको सहयोग अपेक्षा गरिएको बताए।
आफ्नो प्रतिकृया दिनुहोस्