काठमाडौं । हालैको अविरल वर्षाका कारण नेपालमा भएको जनधनको क्षतिप्रति भारतीय प्रधानमन्त्री नरेन्द्र मोदीले गहिरो दु:ख व्यक्त गरेका छन् ।सामाजिक सञ्जाल ‘एक्स’ (पूर्व ट्विटर) मार्फत आइतबार सन्देश जारी गर्दै उनले नेपाल सरकार र जनतासँग ऐक्यभाव प्रकट गर्दै भारत छिमेकी राष्ट्रको हैसियतले आवश्यक सहयोगका लागि सधैं तयार रहेको उल्लेख गरेका छन् ।
प्रधानमन्त्री मोदीले भनेका छन्, “नेपालमा लगातारको भारी वर्षाले जनधनको क्षति पुर्याएको खबर अत्यन्त पीडादायी छ । यस कठिन घडीमा भारत, नेपाल सरकार र नेपाली जनताको साथमा खडा छ । मित्र राष्ट्र र पहिलो प्रत्युत्तरदाताको नाताले भारत आवश्यक सबै प्रकारको सहयोग गर्न प्रतिबद्ध छ ।”
भारी वर्षा सँगै नेपालका विभिन्न प्रदेशमा बाढी, पहिरो र डुबानका कारण ठूलो मानवीय तथा भौतिक क्षति भएको छ । उद्धार तथा राहत कार्य जारी रहँदा भारतले पुनः छिमेकीको भूमिकामा सहयोगको प्रस्ताव अघि सारेको हो ।यस अघि पनि भारतले नेपालमा विपद् व्यवस्थापन, उद्धार, राहत वितरण र पुनर्निर्माणका क्षेत्रमा निरन्तर सहयोग गर्दै आएको छ ।
आफ्नो प्रतिकृया दिनुहोस्