जनकपुरधाम । विभिन्न हिन्दूवादी संगठनका युवा तथा सदस्यहरूले मंगलबार जनकपुरधाममा विरोध प्रदर्शन गरेका छन्। उनीहरूले “धनुषाका एसपी मुर्दावाद”, “हिन्दुलाई रिहा गर”, “जय श्रीराम” जस्ता नारा सहित मोटरसाइकलमा नगर परिक्रमा गरेका थिए।
केही दिन अघि जनकपुरधाम उपमहानगरपालिका–२० रुपैठामा दुर्गा माताको मूर्ति विसर्जनको क्रममा हिन्दू र मुस्लिम समुदायबीच विवाद भएको थियो। सो क्रममा मुस्लिम समुदायतर्फ बाट सिसाको बोतल, ढुंगा, इँटा प्रहार गरिएको र हिन्दू समुदायले विवादित तेलिया पोखरी छेउमा मुस्लिम समुदायले बनाएको टहरा जलाएको घटनाले झनै स्थिति चर्किएको थियो।
घटना पछि धनुषा प्रहरीले स्थिति नियन्त्रणमा लिन अश्रुग्यास प्रहार गरेको थियो र केही स्थानीय युवालाई नियन्त्रणमा लिएको थियो। यिनै युवाहरूलाई रिहा गर्न माग गर्दै आज विरोध र्याली गरिएको हो।विरोधमा सहभागी हिन्दूवादी युवाहरूले पक्राउ परेकाहरूलाई तत्काल रिहा नगरे भोलिदेखि चक्काजाम, टायर बाल्ने प्रदर्शन र बजार बन्दजस्ता कठोर आन्दोलन गर्ने चेतावनी दिएका छन्।
आफ्नो प्रतिकृया दिनुहोस्