काठमाडौँ । सुदन गुरुङको नेतृत्वमा रहेको GEN-Z समूहले पूर्वप्रधानमन्त्री सहित प्रमुख दलका नेताहरूलाई पक्राउ गर्न माग गर्दै दिएको जाहेरी जिल्ला प्रहरी परिसर काठमाडौँले दर्ता गर्न अस्वीकार गरेको छ । मंगलबार परिसरले प्रधानमन्त्रीको लिखित निर्देशन नआए सम्म जाहेरी दर्ता गर्न नसकिने भन्दै समूहलाई फर्काएको हो ।
परिसरबाट बाहिरिने क्रममा समूहका युवा ओजस्वी थापाले आगामी अक्टोबर ८ र ९ मा तोकिएको भनिएको जेनजी आन्दोलनमा आफ्नो समूहको कुनै संलग्नता नरहेको प्रष्ट पारे । उनले गत सरकारले दमन मार्फत अनावश्यक रक्तपात गरेको स्मरण गर्दै फेरि त्यस किसिमको हिंसा नचाहिएको बताए ।
थापाले भने, “हामी कुनै तरिकाले आन्दोलनमा उत्रने योजना छैन । देशले पहिले नै धेरै रक्तपात देखिसकेको छ, त्यसैले अब हामी शान्तिपूर्ण वातावरण चाहन्छौं । हामीलाई भ्रममा पार्ने प्रयास भइरहेको छ तर भोलि वा पर्सि हाम्रो कुनै कार्यक्रम छैन ।”
उनले सुशासन स्थापनाको आवश्यकता जोड दिँदै नागरिकलाई कानुन र सरकारलाई आफ्नो हिसाबले काम गर्न दिन आग्रह गरे । “जबसम्म सुशासन कायम हुँदैन, तबसम्म देशको भविष्य बन्न सक्दैन । त्यसैले सबैलाई अनुरोध छ, घरमै शान्त र आनन्दले बसौँ र राज्यका संयन्त्रलाई काम गर्न दिऔँ,” उनले भने ।
आफ्नो प्रतिकृया दिनुहोस्