जनकपुर । जनकपुरधाममा जारी जनता समाजवादी पार्टी (जसपा) नेपालको मधेश प्रदेश अधिवेशनमा आन्तरिक विवाद सतहमा आएको छ। नयाँ नेतृत्व चयनका लागि सुरु भएको निर्वाचन प्रक्रियामध्ये एक पक्षले अधिवेशन नै बहिष्कार गर्ने घोषणा गरेको हो।
आज जनकपुरधाममा पत्रकार सम्मेलन गर्दै अध्यक्ष पदका उम्मेदवार योगेन्द्र यादवले अधिवेशन विधानविपरीत भइरहेको भन्दै बहिष्कारको घोषणा गरे। यादवले भने, “विधान अनुसारको प्रक्रिया नअपनाई मनोनयन र प्रतिनिधि छनोट मनलाग्दी ढंगले गरिएको छ, त्यसैले यस्तो अधिवेशनमा सहभागी हुन सकिँदैन।”
यादवसँगै उनको प्यानलका उम्मेदवारहरूले पनि निर्वाचन प्रक्रिया बहिष्कार गरेका छन्। साथै रौतहट, सप्तरी, बारा, धनुषा र सर्लाहीका जिल्ला अध्यक्षहरूले समेत यादवको समर्थन गर्दै अधिवेशन बहिष्कार गर्ने निर्णय सार्वजनिक गरेका छन्।
यादवले आरोप लगाउँदै भने, “अध्यक्ष पदका अर्का उम्मेदवार बालकिशोर यादवले विधान उल्लंघन गर्दै हुलका हुल प्रतिनिधि छनोट गरेका छन् र हामीलाई बन्दसत्रमा समेत बेवास्ता गरिएको छ।”
यता अधिवेशनको कार्यतालिका अनुसार आज निर्वाचनको सम्पूर्ण प्रक्रिया अघि बढाइएको छ। बहिष्कार गर्ने पक्ष बाहेक अन्य उम्मेदवार र मतदाताहरूले बाँकी निर्वाचन प्रक्रिया जारी राखेका छन्। साथै अन्य पदहरूको उम्मेदवारी प्रक्रिया पनि सुरु गरिएको छ।
आफ्नो प्रतिकृया दिनुहोस्