एजेन्सी ।चीनले स्मार्ट प्रविधिमा आधारित यातायात प्रणालीतर्फ अर्को महत्वपूर्ण कदम चालेको छ। चीनका प्रमुख सहरहरू बेइजिङ र चोङकिङका सडकमा अब चालकविहीन (स्वचालित) कारहरू नियमित रूपमा गुड्न थालेका छन्। कृत्रिम बौद्धिकता (AI), सेन्सर र अत्याधुनिक सफ्टवेयर प्रविधिमा आधारित यी सवारी साधनहरूले यातायात क्षेत्रमा नयाँ युगको संकेत गरेका छन्।
चीन सरकारले स्वचालित सवारी साधनलाई ठूलो मात्रामा उत्पादन र व्यावसायिक प्रयोगमा ल्याउने उद्देश्यका साथ परीक्षणलाई तीव्रता दिएको छ। यही सिलसिलामा जनवरी महिना देखि बेइजिङमा एल–थ्री (L3) स्तरको पूर्ण विद्युतीय सेडान कारको पहिलो ब्याच राजमार्ग र एक्सप्रेस-वे हरूमा व्यापक परीक्षणका लागि सञ्चालनमा ल्याइएको हो।
चाङ्गान टेक्नोलोजीका इन्टेलिजेन्ट ड्राइभिङ सिस्टम डिजाइन तथा विश्लेषण विभागका उपप्रमुख इन्जिनियर लिउ युकिङका अनुसार यी चालकविहीन कारहरू जटिल सडक अवस्था सामना गर्न सक्षम बनाइएका छन्। उनले भने, “क्रसिङ, ब्याकलाइट, रातको समय, वर्षा र कुहिरो जस्ता चुनौतीपूर्ण वातावरणमा पनि कारले उच्च सुरक्षा र स्थिर प्रदर्शन गर्छ।”
यी कारहरूमा जडान गरिएका उच्चस्तरीय क्यामेरा, राडार, लिडार (LiDAR) तथा सेन्सर प्रणालीले वरपरको वातावरण, अन्य सवारी साधन, ट्राफिक संकेत र पैदलयात्रीको गतिविधि वास्तविक समयमै विश्लेषण गर्छन्। सोही आधारमा कारले आफैं निर्णय गरी गति नियन्त्रण, मोड, ब्रेक र लेन परिवर्तन गर्ने गर्दछ।
विशेषज्ञहरूका अनुसार चालकविहीन सवारी साधनले भविष्यमा ट्राफिक दुर्घटना घटाउन, इन्धन खपत कम गर्न र सहरी यातायात व्यवस्थापनलाई अझ प्रभावकारी बनाउन सहयोग पुर्याउने अपेक्षा गरिएको छ। चीनमा गरिएको यो परीक्षणलाई विश्वव्यापी रूपमा स्वचालित यातायात प्रविधिको महत्वपूर्ण उपलब्धिका रूपमा हेरिएको छ।
(सीसीटीभी प्लस)
आफ्नो प्रतिकृया दिनुहोस्