एजेन्सी। अमेरिकी राष्ट्रपति डोनाल्ड ट्रम्पले इरान सँगको बढ्दो तनावका बीच कूटनीतिक सम्झौता हुनेमा आफू आशावादी रहेको बताएका छन्। इरानका सर्वोच्च नेता आयतोल्लाह अली खामेनेईले अमेरिकाले युद्ध सुरु गरे त्यसले ‘क्षेत्रीय युद्ध’को रूप लिने चेतावनी दिएको केही घण्टा पछि ट्रम्पको यस्तो प्रतिक्रिया आएको हो।
फ्लोरिडा स्थित आफ्नै निवासमा सञ्चारकर्मीहरूसँग कुरा गर्दै ट्रम्पले मध्यपूर्व क्षेत्रमा अमेरिकाले विश्वकै शक्तिशाली सैन्य साधन र युद्धपोतहरू तैनाथ गरे तापनि आफ्नो प्राथमिकता सधैँ कूटनीतिक समाधान नै रहेको स्पष्ट पारेका छन्।यस अघि इरानका सर्वोच्च नेता खामेनेईले सामाजिक सञ्जाल ‘एक्स’मार्फत अमेरिकालाई कडा चेतावनी दिँदै युद्ध सुरु भए त्यसले सम्पूर्ण क्षेत्रलाई नै लपेट्ने बताएका थिए।
उनले इरान माथि आक्रमण भए कडा र निर्णायक जवाफ दिने भन्दै इरानी जनता सैन्य धम्की बाट नडराउने प्रस्ट पारेका छन्। खामेनेईले अमेरिकाले इरानको तेल, ग्यास र खनिज स्रोतमाथि पुन: प्रभुत्व जमाउन खोजेको आरोप समेत लगाएका छन्।
तनावपूर्ण स्थितिका बीच इरानको सर्वोच्च राष्ट्रिय सुरक्षा परिषद्का सचिव अली लारिजानीले भने दुई देश बीच वार्ताको तयारी भइरहेको खुलासा गरेका छन्। उनले सञ्चारमाध्यममा आएका हल्ला भन्दा फरक ढंगले वार्ताका संरचनात्मक तयारीहरू अगाडि बढिरहेको बताएका छन्, यद्यपि वार्ताको ठोस ढाँचाबारे भने विस्तृत खुलाइएको छैन।
अमेरिकाले हाल इरान नजिकै ‘यूएसएस अब्राहम लिंकन’को नेतृत्वमा ठूलो नौसैनिक समूह तैनाथ गरेर सैन्य दबाब बढाइरहेको छ। ट्रम्पले इरान आणविक हतियार सम्बन्धी छलफलका लागि इच्छुक रहेको दाबी गर्दै यसका लागि निश्चित समयसीमा समेत तोकिएको संकेत दिएका छन्। तनाव उत्कर्षमा पुगे पनि दुवै पक्षले कूटनीतिको ढोका खुल्लै राख्नुलाई विश्व राजनीतिमा अर्थपूर्ण रूपमा हेरिएको छ।(एएनआई)
आफ्नो प्रतिकृया दिनुहोस्