७ चैत,जनकपुर : हाल नेपालमा पश्चिमी न्यून चापीय प्रणाली र स्थानीय वायुको संयुक्त प्रभावका कारण देशभरिको मौसममा उल्लेख्य परिवर्तन आएको छ। जल तथा मौसम विज्ञान विभागका अनुसार मधेश, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली भू-भागमा पूर्ण रूपमा बादल लागेको छ भने बाँकी क्षेत्रमा पनि सामान्य बदलीको अवस्था छ।
अहिले बागमती र गण्डकी प्रदेशका केही स्थानहरूका साथै अन्य प्रदेशका थोरै ठाउँमा मेघगर्जन र चट्याङ्ग सहित मध्यम स्तरको वर्षा र हिमपात भइरहेको छ। आज दिउँसो देशभरको आकाश अधिकांश बादलले ढाकिने सम्भावना छ। विशेषगरी कोशी, मधेश, बागमती र गण्डकी प्रदेशका धेरै स्थानहरूमा तथा लुम्बिनी, कर्णाली र सुदूरपश्चिम प्रदेशका केही ठाउँमा असिना र हावाहुरी सहित मध्यम वर्षा र हिमपातको सम्भावना रहेको छ।
यसैगरी, आज राती पनि देशभर सामान्य बदलीकै अवस्था रहने देखिन्छ। कोशी प्रदेशका थोरै स्थान र अन्य प्रदेशका पहाडी तथा हिमाली भू-भागका एक-दुई स्थानमा मेघगर्जन र चट्याङ्ग सहित हल्का वर्षा र हिमपातको सम्भावना रहेको मौसमविद्हरूले बताएका छन्। वर्षा र हावाहुरीको सम्भावना रहेकाले आवश्यक सतर्कता अपनाउन विभागले आग्रह गरेको छ।
आफ्नो प्रतिकृया दिनुहोस्