१४ चैत,काठमाडौं। नेकपा एमालेका अध्यक्ष तथा पूर्वप्रधानमन्त्री केपी शर्मा ओलीलाई प्रहरीले शनिबार बिहान पक्राउ गरेको छ। उनलाई भक्तपुरको गुण्डु स्थित निवासबाट पक्राउ गरी भद्रकाली स्थित जिल्ला प्रहरी परिसर काठमाडौंमा ल्याइएको प्रहरीले जनाएको छ।
त्यसैगरी, पूर्वगृहमन्त्री रमेश लेखकलाई पनि प्रहरीले पक्राउ गरेको छ। उपत्यका अपराध अनुसन्धान कार्यालयको टोलीले सशस्त्र प्रहरीको सहयोगमा लेखकलाई भक्तपुरको कटुन्जे स्थित निवासबाट पक्राउ गरेको हो।
सरकारको निर्णय अनुसार भदौ २३ र २४ गते भएको जेनजी आन्दोलन दमन सम्बन्धी घटनामा अनुसन्धान गर्न पक्राउ गरिएको प्रहरीले जनाएको छ। यस घटनाबारे छानबिन गर्न गठित गौरीबहादुर कार्की नेतृत्वको आयोगले पूर्वप्रधानमन्त्री ओली, पूर्वगृहमन्त्री लेखक सहित केन्द्रीय सुरक्षा समितिका पदाधिकारीमाथि फौजदारी मुद्दा चलाउन सिफारिस गरेको थियो।
शुक्रबार बालेन्द्र (बालेन) शाह नेतृत्वको पहिलो मन्त्रिपरिषद् बैठकले उक्त आयोगको सिफारिस कार्यान्वयन गर्ने निर्णय गरेपछि प्रहरीले उनीहरूलाई जरुरी पक्राउ पुर्जी जारी गरी नियन्त्रणमा लिएको हो।
पक्राउ पछि दुवै नेताको नियमित स्वास्थ्य परीक्षणका लागि त्रिभुवन विश्वविद्यालय शिक्षण अस्पताल लगिएको प्रहरीले जनाएको छ। स्वास्थ्य परीक्षणपछि उनीहरूलाई पुनः जिल्ला प्रहरी परिसर काठमाडौंको हिरासतमा राखिने बताइएको छ।
यसैबीच, एमाले अध्यक्ष ओली पक्राउ परेपछि नेकपा एमालेले आकस्मिक बैठक बोलाएको छ। पार्टी सचिव महेश बस्नेतले शनिबार बिहान साढे ८ बजे बस्ने गरी सचिवालय बैठक आह्वान गरिएको जानकारी दिएका छन्। बैठकले आन्दोलनका कार्यक्रम सार्वजनिक गर्ने र पछिल्लो राजनीतिक अवस्थाबारे छलफल गर्ने बताइएको छ।
बस्नेतले सामाजिक सञ्जाल मार्फत प्रतिक्रिया दिँदै यस्तो कदमले राजनीतिक प्रतिशोध र पूर्वाग्रहको झल्को दिने बताएका छन्। उनले लोकतन्त्रका लागि संघर्ष गरेका नेताहरूलाई पक्राउ गर्न प्रहरी ठूलो संख्यामा परिचालन गरिएको भन्दै दु:ख व्यक्त गरेका छन्।
आफ्नो प्रतिकृया दिनुहोस्