१८ चैत,मकवानपुर । मकवानपुरका दुर्गम क्षेत्र कैलाश गाउँपालिका र राक्सिराङ गाउँपालिकामा अवैध गाँजा तथा अफिम खेती नियन्त्रणका लागि जिल्ला प्रशासन कार्यालयले कडाइ गर्ने भएको छ। प्रमुख जिल्ला अधिकारी बसन्त अधिकारीले ती क्षेत्रमा विशेष निगरानी बढाइएको जानकारी दिएका छन्।
उनका अनुसार केही स्थानमा अझै पनि गाँजा र अफिम खेती भइरहेको सूचनाका आधारमा अनुगमनलाई तीव्र बनाइएको हो। अवैध खेती पूर्ण रूपमा नियन्त्रण गर्न स्थानीय तह, जनप्रतिनिधि, शिक्षक, कर्मचारी तथा सुरक्षाकर्मीबीच प्रभावकारी समन्वय आवश्यक रहेको उनले बताएका छन्।
‘खेती प्रणाली परिवर्तन गरी वैकल्पिक उत्पादनमा नलागेमा र गाँजा वा अफिम खेती गरेको पाइएमा कानुनअनुसार कडा कारबाही गरिनेछ,’ प्रजिअ अधिकारीले चेतावनी दिए।
जिल्ला प्रशासन कार्यालयले किसानलाई वैकल्पिक खेती तर्फ आकर्षित गर्न जनचेतनामूलक कार्यक्रम सञ्चालन गर्ने तयारी गरेको जनाएको छ। साथै, स्थानीय तहलाई अवैध खेती पहिचान गरी नियन्त्रणमा सक्रिय भूमिका निर्वाह गर्न निर्देशन दिइएको छ।
प्रशासनले किसानहरूलाई कानुनी दायराभित्र रही उत्पादनमुखी र दीगो खेती प्रणाली अपनाउन आग्रह गरेको छ।
आफ्नो प्रतिकृया दिनुहोस्