३ चैत,काठमाडौं । गैरआवासीय नेपाली संघ(एनआरएनए)ले दुई जना संचारकर्मीलाई पुरस्कृत गरेको छ । सोमबार काठमाडौंमा सम्पन्न एनआरएनएको १२ औँ अधिवेशन तथा विश्व सम्मेलनको अवसरमा आयोजित कार्यक्रममा नेपाल न्यूज बैंक समाचार एजेन्सीका सम्पादक युवराज गौतम र आर्थिक न्यूज डटकमकी कार्यकारी सम्पादक मुना कुँवरलाई पुरस्कृत गरेको हो ।
विदेशमा बसोबास गर्ने नेपालीहरुका मुद्दामा कलम चलाएको एवम उत्कृष्ट रिसर्च आर्टिकल लेखे वापत उनीहरुलाई पुरस्कृत गरिएको हो ।गैरआवासीय नेपाली संघ यूकेले सन् २०१३ मा स्थापना गरेको ‘उत्कृष्ट एनआरएनए पुरस्कार’ अन्तर्गत यस वर्ष उत्कृष्ट रिसर्च आर्टिकलका आधारमा उनीहरू चयन भएका हुन् ।
एनआरएनएका मिडिया संयोजक चिरन शर्माका अनुसार गौतमलाई गैरआवासीय नेपालीहरूको मताधिकार सम्बन्धी गहिरो अनुसन्धानमूलक लेखका लागि सम्मान गरिएको हो । लामो समय देखि सत्य, निष्पक्ष र तथ्यमा आधारित पत्रकारिता गर्दै आएका गौतमको योगदानलाई उच्च मूल्याङ्कन गर्दै उक्त सम्मान प्रदान गरिएको हो ।
गौतम निरन्तर रुपमा राष्ट्रिय तथा अन्तर्राष्ट्रिय विषयमा अनुसन्धानमूलक र तथ्यपरक सामग्री प्रस्तुत गर्दै पाठकहरूको विश्वास जित्दै आएका छन । कुँवर विदेशमा रहेका नेपाली श्रमिकहरुका मुद्दामा कलम चलाउँदै आएकी छिन् ।कार्यक्रममा एनआरएनएका अध्यक्ष डा. बद्री केसी र यूकेका अध्यक्ष राजेन्द्र पुडासैनीले संयुक्त रूपमा गौतम र कुँवरलाई नगद सहित पुरस्कार प्रदान गरेका थिए ।
आफ्नो प्रतिकृया दिनुहोस्