महोत्तरी । महोत्तरी जिल्लामा आर्थिक वर्ष २०८२/८३ मा सञ्चालित स्वास्थ्य कार्यक्रमहरूको वार्षिक समीक्षामा मटिहानी नगरपालिका दोस्रो स्थान हासिल गर्न सफल भएको छ। स्वास्थ्य क्षेत्रमा उत्कृष्ट कार्यसम्पादन गर्दै आएको नगरपालिकाले लगातार तेस्रो वर्ष जिल्लामा दोस्रो स्थान कायम गरेको हो।
स्वास्थ्य कार्यालय महोत्तरी, जलेश्वरद्वारा २०८३ साल कात्तिक १२ र १३ गते आयोजित वार्षिक समीक्षामा मनराशिसवा नगरपालिकाले ७८.५ अंक प्राप्त गर्दै पहिलो स्थान हासिल गरेको छ भने मटिहानी नगरपालिकाले ७८.२ अंक प्राप्त गरी दोस्रो स्थानमा रहन सफल भएको हो।
वार्षिक समीक्षामा जिल्लाका विभिन्न स्थानीय तहमा सञ्चालित खोप, पोषण, परिवार नियोजन, मातृ तथा नवजात शिशु स्वास्थ्यलगायतका कार्यक्रमहरूको कार्यसम्पादनका आधारमा मूल्याङ्कन गरी अंक प्रदान गरिएको स्वास्थ्य कार्यालय महोत्तरीले जनाएको छ।
स्वास्थ्य क्षेत्रमा निरन्तर उत्कृष्ट कार्यसम्पादन गर्दै दोस्रो स्थान हासिल गरेको मटिहानी नगरपालिकाका स्वास्थ्य शाखा प्रमुख जनस्वास्थ्य अधिकृत पवन कुमार मण्डललाई कार्यक्रममा टीका, माला तथा प्रमाणपत्रसहित सम्मान गरिएको थियो।
मटिहानी नगरपालिकामा हाल ४ वटा स्वास्थ्य चौकी, ५ वटा आधारभूत स्वास्थ्य सेवा केन्द्र, २ वटा प्रसूति गृह (Birthing Center) र २ वटा प्रयोगशाला सञ्चालनमा रहेका छन्। नगरपालिकाले स्वास्थ्य संस्थाहरूको विस्तारसँगै आवश्यक जनशक्ति, औषधि तथा उपकरणको व्यवस्थापन गरी नागरिकलाई निरन्तर स्वास्थ्य सेवा प्रदान गर्दै आएको छ।
नगर प्रमुख हरि प्रसाद मण्डलका अनुसार स्थानीय सरकार स्थापना भएपछि नगरपालिकाले ५ वटा आधारभूत स्वास्थ्य सेवा केन्द्र, २ वटा प्रसूति गृह र २ वटा प्रयोगशाला निर्माण गरी सञ्चालनमा ल्याएको हो। स्वास्थ्य सेवाको पहुँच विस्तार तथा गुणस्तरीय सेवा प्रवाहका लागि नगरपालिकाले निरन्तर काम गर्दै आएको उहाँले बताउनुभयो।
यसैबीच, वार्षिक समीक्षामा दोस्रो स्थान हासिल गरेको अवसरमा मटिहानी नगर कार्यपालिकाको कार्यालय, धिरापुरमा आयोजित कार्यक्रममा नगर प्रमुख हरि प्रसाद मण्डलले स्वास्थ्य शाखा तथा नगरपालिकाअन्तर्गतका सम्पूर्ण स्वास्थ्य संस्थाका प्रमुखहरूलाई धन्यवाद दिँदै सम्मान गर्नुभएको छ।
नगरपालिकाले स्वास्थ्य क्षेत्रमा हासिल गरेको उपलब्धि स्वास्थ्यकर्मीहरूको निरन्तर मेहनत, समर्पण र स्थानीय सरकारको सहयोगको परिणाम भएको उल्लेख गर्दै नगर प्रमुख मण्डलले आगामी दिनमा पनि स्वास्थ्य सेवाको गुणस्तर र पहुँचलाई थप प्रभावकारी बनाउने प्रतिबद्धता व्यक्त गर्नुभयो।
आफ्नो प्रतिकृया दिनुहोस्