काठमाडौं । सरकारले नेपाल प्रहरीका महानिरीक्षक (आईजीपी) दान बहादुर कार्कीलाई जिम्मेवारीबाट हटाउँदै अतिरिक्त प्रहरी महानिरीक्षक (एआईजी) डा. मनोजकुमार केसीलाई नयाँ प्रहरी प्रमुख नियुक्त गरेको छ। बुधबार बसेको मन्त्रिपरिषद्को आकस्मिक बैठकले प्रहरी नेतृत्व परिवर्तन गर्ने निर्णय गरेको हो।
मन्त्रिपरिषद्को निर्णयअनुसार कार्कीलाई प्रधानमन्त्रीको विशेष सुरक्षा सल्लाहकारको जिम्मेवारी दिइएको छ। प्रधानमन्त्रीलाई सुरक्षा व्यवस्था सम्बन्धी आवश्यक सुझाव, परामर्श र सल्लाह प्रदान गर्ने उद्देश्यले प्रधानमन्त्री तथा मन्त्रिपरिषद्को कार्यालयमा विशेष सुरक्षा सल्लाहकारको पद सिर्जना गरिएको सरकारले जनाएको छ।
सरकारका प्रवक्ता एवं शिक्षा तथा खेलकुदमन्त्री सस्मित पोखरेलले कार्कीको जिम्मेवारी परिवर्तनलाई कारबाहीका रूपमा नलिन आग्रह गरेका छन्। उनका अनुसार वर्तमान परिस्थितिमा मुलुकको शान्ति तथा सुरक्षा व्यवस्था थप प्रभावकारी बनाउन जिम्मेवारी हेरफेर गरिएको हो।
नयाँ प्रहरी महानिरीक्षक नियुक्त भएका डा. मनोजकुमार केसी नेपाल प्रहरीभित्र अनुभवी अधिकृतका रूपमा परिचित छन्। प्रहरी सेवामा प्रहरी निरीक्षकबाट प्रवेश गरेका उनले विभिन्न महत्वपूर्ण जिम्मेवारी सम्हाल्दै आएका छन्। केन्द्रीय अनुसन्धान ब्युरो (सीआईबी) तथा अपराध अनुसन्धानसँग सम्बन्धित निकायमा कार्यरत रहँदा उनले चर्चित आपराधिक घटनाहरूको अनुसन्धानमा भूमिका निर्वाह गरेका थिए।
विशेषगरी नक्कली भुटानी शरणार्थी प्रकरणको अनुसन्धानका क्रममा केसी चर्चामा आएका थिए। उक्त प्रकरणमा अनुसन्धान अघि बढाउने क्रममा उनले निर्वाह गरेको भूमिकालाई प्रहरी संगठनभित्र महत्वपूर्ण मानिएको थियो।
यसअघि प्रहरी नेतृत्व परिवर्तनको विषय सार्वजनिक भएपछि नेपाल प्रहरीभित्र पनि चर्चा र चासो बढेको थियो। प्रहरी संगठनलाई विवादमा तान्ने गतिविधिप्रति सचेत रहनुपर्ने भन्दै प्रहरीले विज्ञप्तिसमेत जारी गरेको थियो। त्यसै पृष्ठभूमिमा सरकारले प्रहरी नेतृत्व परिवर्तन गर्ने निर्णय गरेको हो।
आईजीपी पदबाट हटाइएका दानबहादुर कार्कीले सरकारको निर्णयविरुद्ध कानुनी उपचार खोज्ने तयारी गरेको समाचारसमेत सार्वजनिक भएको छ। यद्यपि सरकारले भने कार्कीलाई कुनै अनुशासनात्मक कारबाही नगरिएको र नयाँ जिम्मेवारी प्रदान गरिएको स्पष्ट पारेको छ।
सरकारको निर्णयसँगै नेपाल प्रहरीको नेतृत्वमा महत्वपूर्ण परिवर्तन भएको छ। नयाँ प्रहरी महानिरीक्षक डा. मनोजकुमार केसीले संगठनको नेतृत्व सम्हाल्नेछन् भने कार्की प्रधानमन्त्रीलाई सुरक्षा व्यवस्थासम्बन्धी परामर्श दिने जिम्मेवारीमा रहनेछन्।
आफ्नो प्रतिकृया दिनुहोस्