१६ फागुन,सर्लाही । जिल्ला प्रहरी कार्यालय सर्लाहीले सब–इन्जिनियर प्रमोद कुमार यादव हत्या प्रकरणको सफल अनुसन्धानमा महत्वपूर्ण भूमिका निर्वाह गर्ने चार जना प्रहरी कर्मचारीलाई नगद पुरस्कार सहित सम्मान गरेको छ ।
जिल्ला पूर्वाधार विकास कार्यालय मलंगवामा कार्यरत ३६ वर्षीय यादवको गोली प्रहार गरी हत्या भएको घटनामा संलग्न आरोपितहरू लाई पक्राउ गरी कानुनी दायरामा ल्याउन प्रहरी निरीक्षक विशाल बहादुर बुढाथोकी, प्रहरी निरीक्षक विरेन्द्र वि.सी., प्रहरी नायव निरीक्षक सुजन पुडासैनी र प्रहरी जवान अजय सहनीले विशेष योगदान दिएका थिए । कार्यालयका अनुसार उनीहरूको सक्रियता र समन्वयका कारण घटनाको तथ्य बाहिर ल्याउन र अभियुक्तलाई नियन्त्रणमा लिन सफलता मिलेको हो ।
प्रहरीका अनुसार घटना पछि फरार रहेका आरोपितहरू लाई प्राविधिक विश्लेषण तथा गोप्य सूचनाका आधारमा खोजी गरी पक्राउ गरिएको हो । पक्राउ परेका विरुद्ध कानुनी प्रक्रिया अघि बढाइएको छ । अपराध नियन्त्रण र दोषीलाई कानुनी दायरामा ल्याउन उत्कृष्ट कार्य गर्ने प्रहरी कर्मचारीलाई प्रोत्साहन स्वरूप पुरस्कृत गर्ने नीति अनुसार सम्मान गरिएको जनाइएको छ ।
सिरहा सुखीपुर नगरपालिका–९ बैशाखा घर भई हाल सर्लाही मलंगवा नगरपालिका–१० मा डेरा गरी बस्दै आएका यादवलाई गत फागुन ३ गते साँझ करिब ७:५५ बजे फोन गरेर बाहिर बोलाइएको थियो । उनी डेराबाट निस्किएको केही समयमै अज्ञात व्यक्तिबाट गोली प्रहार भएको थियो । गम्भीर घाइते यादवको उपचारका क्रममा प्रादेशिक अस्पताल मलंगवामा मृत्यु भएको थियो ।
अनुसन्धानबाट हत्या योजनाबद्ध रूपमा गरिएको खुल्न आएको प्रहरीले जनाएको छ । मधेश प्रदेश लोक सेवा आयोगको परीक्षामा प्रतिस्पर्धामा रहेका तथा वैकल्पिक सूचीमा परेका एक उम्मेदवारको योजनामा हत्या भएको प्रारम्भिक अनुसन्धानबाट देखिएको छ । घटनामा संलग्न तीन जनालाई प्रहरीले पक्राउ गरिसकेको छ भने थप अनुसन्धान जारी रहेको जनाएको छ ।
आफ्नो प्रतिकृया दिनुहोस्