३१साउन, जनकपुरधाम। अख्तियार दुरुपयोग अनुसन्धान आयोगले धनुषा जिल्ला स्थित सबैला नगरपालिकाका तत्कालीन इन्जिनियर रंजित कुमार यादव, वडा नं. ८ का पूर्व वडा अध्यक्ष दुर्गा प्रसाद रायसहित सात जना विरुद्ध भ्रष्टाचार मुद्दा दायर गरेको छ। उनीहरूलाई सार्वजनिक सम्पत्ति हिनामिना गर्दै आर्थिक हानि पुर्याएको अभियोग लगाइएको छ।
अख्तियारका अनुसार कृषि प्रवर्द्धन कार्यक्रमको नाममा अनियमितता गर्दै झुटा बिल भरपाई र नक्कली कागजात तयार पारेर १४ लाख ७७ हजार ५ सय रुपैयाँ हिनामिना भएको पुष्टि भएपछि विशेष अदालत, काठमाडौंमा अभियोगपत्र दायर गरिएको हो।
अभियोगमा पर्ने अन्य व्यक्तिहरू
मुद्दामा समावेश अन्य व्यक्तिहरूमा तत्कालीन लेखापाल शिव कुमार झा, पशु सेवा शाखाका प्रमुख राजकिशोर सल्हैता, अर्चना कृषि सहकारी संस्थाकी अध्यक्ष संजु कुमारी यादव, तथा तत्कालीन प्रशासकीय अधिकृत स्व. बालवीर ठाकुरकी श्रीमती पलवी ठाकुर र छोरा रौनित ठाकुर पनि छन्। उनीहरू माथि पनि सोही रकम बराबरको बिगो माग सहित कारबाहीको माग गरिएको छ।
कार्यक्रममा अनियमितता
आर्थिक वर्ष २०७७/०७८ मा कृषि प्रवर्द्धन कार्यक्रम अन्तर्गत सबैला नगरपालिका वडा नं. ८ मा “बाख्रा फार्म” दर्ता गरी अनुदानको रकम दुरुपयोग गरिएको अख्तियारले जनाएको छ। प्रधानमन्त्री कृषि आधुनिकीकरण परियोजना अन्तर्गत १५ लाख रुपैयाँ विनियोजन गरिएकामा सार्वजनिक सूचना प्रकाशन नगरी एकल सहकारी संस्था—अर्चना कृषि सहकारी संस्था लिमिटेड—लाई सो रकम दिइएको थियो।
उक्त संस्था सँग सम्झौता भए पनि खरिद गरिएका भनिएका बोका, पाठी, खसी र च्यापकहरू मध्ये को–कोलाई वितरण गरियो भन्ने विवरण अस्पष्ट रहेको तथा खरिद स्रोतका रूपमा देखाइएको राधा कृषि फर्मले वास्तविक रूपमा कारोबार नगरेको पुष्टि भएको अख्तियारको दाबी छ।
झुटा कागजात र फर्जी बिल
राधा कृषि फर्मबाट खरिद गरिएको भनिएको बोका र डाले घाँस सम्बन्धमा सो फर्मले बिलमा उल्लेख भएअनुसार सामान नबेचेको प्रमाण भेटिएको छ। साथै, आन्तरिक राजस्व कार्यालय जनकपुरको प्रतिवेदन अनुसार सो आर्थिक वर्षमा राधा कृषि फर्मले कुनै कारोबार नै नगरेको उल्लेख छ। यस आधारमा अख्तियारले उक्त रकम हिनामिना गर्न योजनाबद्ध रुपमा मिलेमतो गरिएको निष्कर्ष निकालेको छ।
आफ्नो प्रतिकृया दिनुहोस्