रौतहट । रौतहटको गौर नगरपालिका–९ मुडवलवा सडकमा शनिबार राति सुटकेस भित्र महिलाको शव फेला परेको छ।
जिल्ला प्रहरी कार्यालय रौतहटका डिएसपी राजन कार्कीका अनुसार गौर–सिरसिया सडकखण्ड अन्तर्गत मुडवलवा मोड नजिक राति करिब १०:३० बजे शंकास्पद सुटकेस भेटिएको थियो। डोरीले बाँधिएको अवस्थामा फेला परेको सो सुटकेस आइतबार बिहान खोल्दा भित्र एक महिलाको शव भेटिएको हो।
प्रहरीले प्रारम्भिक अनुसन्धानका क्रममा उक्त शव माधव नारायण नगरपालिका–६ माधोपुर माइत भई हाल गौर नगरपालिका–२ महादेवपट्टीमा डेरा गरी बस्दै आएकी २६ वर्षीया रुबि कुमारी साह सुडिको रहेको पुष्टि गरेको छ। मृतक भारतको मुज्जफरपुर जिल्ला रक्साटोल निवासी शिवसागर साहकी पत्नी रहेको प्रहरीले जनाएको छ।
शनिबार बेलुकी ६ बजे ‘ब्यूटी पार्लर जान्छु’ भनेर घरबाट निस्किएकी रुबि कुमारी लाई परिवारले फोन गर्दा सम्पर्क नहुँदा प्रहरीलाई खबर गरिएको थियो। अनुसन्धानमा संलग्न प्रहरीले शवमा साडी छिरिएको अवस्था देखिएकाले हत्या गरी सुटकेसमा हालिएको हुन सक्ने प्रारम्भिक अनुमान गरेको छ।
घटनास्थल नजिकै रहेको एक विद्यालयको सीसीटीभी फुटेज जाँच भइरहेको र थप अनुसन्धान अघि बढाइएकाे प्रहरीले जनाएको छ।यस अघि पनि हालसालै रौतहटमा छुट्टा-छुट्टै घटनामा सहाबुदिन मिया र सप्तरीका उपेन्द्र भगतको शव भेटिएको थियो।
एक साता भित्र मात्रै जिल्लामा तीन जनाको शव फेला परेको घटनाले सुरक्षा चुनौती थपिएको स्थानीयले बताएका छन्।
आफ्नो प्रतिकृया दिनुहोस्