४ चैत,काठमाडौं । खोटाङको बालवेशी क्षेत्रमा एयर डाइनेस्टीको हेलिकप्टर दुर्घटनामा परेका घाइतेलाई तत्काल उद्धार गरी काठमाडौं ल्याइएको छ।विमानस्थल कार्यालयका अनुसार दुर्घटनामा एक जना यात्रु घाइते भएका थिए। घाइते यात्रु तथा पाइलटलाई हेलिकप्टरमार्फत उद्धार गर्दै दिउँसो १२:४२ बजे काठमाडौं स्थित ह्याम्स अस्पतालमा भर्ना गरिएको हो, जहाँ उनीहरूको उपचार भइरहेको छ।
उक्त हेलिकप्टर काठमाडौंबाट ५ जना यात्रु र १ जना पाइलट सहित कुल ६ जना बोकेर खोटाङको बालवेशी तर्फ उडेको थियो। बुधबार बिहान ११:०९ बजे अवतरणका क्रममा हेलिकप्टर असन्तुलित भई जमिनमा पल्टिएको जनाइएको छ।
त्रिभुवन अन्तर्राष्ट्रिय विमानस्थल नागरिक उड्डयन कार्यालयका अनुसार ‘एन–एएफक्यु’ कल साइन भएको उक्त हेलिकप्टर खानिडाँडाबाट करिब १७ किलोमिटर उत्तर–पूर्व पर्ने बालवेशी क्षेत्रमा अवतरण गर्ने क्रममा दुर्घटनामा परेको हो।
खोज तथा उद्धार समन्वय केन्द्रले घटनाबारे थप विवरण संकलन गरिरहेको जनाएको छ भने दुर्घटनाको वास्तविक कारणबारे विस्तृत अनुसन्धान जारी रहेको छ।
आफ्नो प्रतिकृया दिनुहोस्