सिरहा । सिरहाको गोलबजार नगरपालिका–१३ डंग्राहा गाउँका १५ वर्षीय अभिषेक सिंह अपहरणमा परेका आशंका गरिएको छ। परिवारजनले यस बारे इलाका प्रहरी कार्यालय गोलबजारमा उजुरी दिएका छन्।
असोज ५ गते राति करिब ८:३० बजे खाना खाएपछि घर बाहिर आँगनमा निस्केका अभिषेक हराए। रातभर आमा सहित बाजे बज्याले खोज्दा पनि भेटिएनन्। भोलिपल्ट असोज ६ गते बिहान करिब ८ बजे अभिषेककै इमो आईडी बाट आमाको इमोमा पठाइएको सन्देशमा ५ करोड रुपैयाँ फिरौती माग गरिएको थियो। सन्देशमा रकम अंक र अक्षर दुवैमा उल्लेख गरिएको प्रहरीले जनाएको छ।
अभिषेकका पिता सञ्जय सिंहको ७ वर्षअघि करेण्ट लागी मृत्यु भएको थियो। अहिले अभिषेक परिवारको एक मात्र वारिस रहेको वृद्ध बाजे लक्ष्मण सिंहले बताए। नाति हराएको समाचारले उनी र परिवार शोकमा डुबेका छन्। असोज ६ गते मध्यान्हमा आमा सहित परिवारजनले प्रहरीमा लिखित उजुरी दर्ता गरेका थिए।
घटना पछि प्रहरीले अपहरणको अनुसन्धान, खोजतलास र उद्धार कार्य सुरु गरेको छ। इलाका प्रहरी कार्यालयका निरीक्षक गोविन्द साहले घटना स्थलमै पुगेर अनुसन्धान अगाडि बढाएको जानकारी दिए। छिमेकीका अनुसार, अभिषेक जनताको माध्यमिक विद्यालय बलहीमा कक्षा ७ सम्म पढेपछि पढाइ छाडेका थिए। हाल उनी आफ्नै परिवारको स्वामित्वमा रहेको सिटी रिक्सा देखि ट्रयाक्टर सम्म चलाउँदै आएका थिए।
यो घटनापछि गोलबजार नगरपालिका र आसपासका बस्तीमा त्रास फैलिएको छ। स्थानीयले आफूलाई असुरक्षित महसुस गरिरहेको बताएका छन्। यसैबीच, पत्रकारलाई परिवारजनले समाचार नलेखिदिन आग्रह गरेका छन्। उनीहरूले समाचार सार्वजनिक भएमा अभिषेकको ज्यानमा थप खतरा पर्न सक्ने भन्दै नाम र विस्तृत विवरण सार्वजनिक नगर्न आग्रह गरेका हुन्।
आफ्नो प्रतिकृया दिनुहोस्