बाजुरा । बाजुराको बडीमालिका नगरपालिका–७ मा अवस्थित धार्मिक तथा पर्यटकीय स्थल कालाजग्रामा देवीको मूर्ति स्थापना गरिएको छ। टाइगर हिलका नामले परिचित यस स्थलमा आइतबार वडाको आर्थिक सहयोग र स्थानीयको सक्रियतामा मूर्ति स्थापना गरिएको हो।
वडा अध्यक्ष धर्मराज उपाध्यायका अनुसार करिब ३ लाख ५० हजार रुपैयाँ लागतमा धनगढीबाट ल्याइएको उक्त मूर्ति करिब ७५–८० केजी तौलको छ। ढम्कने पदमार्ग हुँदै कालाजग्रा सम्म महत्वपूर्ण धार्मिक–पर्यटकीय सन्देश लेख्ने कार्य सम्पन्न गरेपछि मूर्ति स्थापना गरिएको उनले बताए।
उपाध्यायका अनुसार कालाजग्रा धार्मिक र पर्यटकीय सम्भावनाले भरिपूर्ण क्षेत्र भएकाले मूर्ति स्थापना, पदमार्ग निर्माण, भ्युटावर, वातावरण संरक्षण र आवश्यक पूर्वाधार विकासमार्फत पर्यटन प्रवर्द्धनमा सहयोग पुग्ने अपेक्षा गरिएको छ।
स्थानीय वसन्त रोकायाले मूर्ति स्थापना सँगै दैनिक पूजा–आराधना सहज हुने र यसले कालाजग्राको प्रचार–प्रसार तथा धार्मिक पर्यटन प्रवर्द्धनमा टेवा पुग्ने विश्वास व्यक्त गरे। उनले धार्मिक स्थलको संरक्षणमा सबै पक्षले ध्यान दिनुपर्ने आवश्यकता औंल्याए।
समुद्री सतहबाट करिब ३,२०० मिटर उचाइमा अवस्थित कालाजग्रा सदरमुकाम मार्तडी देखि २१ किलोमिटर पूर्वोत्तर दिशामा पर्छ। दुई पहाडबीच सिंहको आकृतिमा देखिने यो स्थललाई स्थानीयले देवीको उत्पत्तिस्थल मानेका छन्। प्रत्येक जनै पूर्णिमामा यहाँ विशेष पूजा गरिन्छ। धार्मिक विश्वास अनुसार कालाजग्रा देवीको आराधना गर्दा घरमा सुख–शान्ति हुने, मनोकामना पूरा हुने र सन्तान लाभ समेत हुने मान्यता रहिआएको छ।
आफ्नो प्रतिकृया दिनुहोस्