१३ चैत,जनकपुरधाम : रामनवमीको अवसरमा जानकी मन्दिर सहित जनकपुरका विभिन्न राम मन्दिरहरूमा आज बिहानै देखि श्रद्धालु भक्तजनहरूको उल्लेख्य भीड लागेको छ । मङ्गल आरती सँगै सुरु भएको पूजा–आराधना दिनभर निरन्तर चलिरहँदा मन्दिर परिसर भजन–कीर्तन, रामधुन र धार्मिक कार्यक्रमले गुञ्जायमान बनेको छ ।
मन्दिरहरूलाई रंगीन बत्ती र फूलमालाले सिँगारिएको छ भने नेपालका विभिन्न जिल्लासँगै भारतबाट आएका तीर्थालुहरूको उपस्थिति पनि उल्लेख्य देखिएको छ । दर्शन व्यवस्थापनलाई सहज बनाउन स्थानीय प्रशासनले सुरक्षा व्यवस्था कडा बनाएको छ भने स्वयंसेवक परिचालन गरी लाइन व्यवस्थापन, प्रसाद वितरण र स्वास्थ्य सेवामा सहजीकरण गरिएको छ ।
यस्तै भारतको अयोध्या स्थित राममन्दिरमा पनि रामनवमी अत्यन्तै भव्य रूपमा मनाइएको छ । लाखौँ श्रद्धालु भक्तजनहरूले रामललाको दर्शनका लागि बिहानै देखि लामो लाइनमा बसेका छन् । मन्दिर परिसरलाई आकर्षक ढंगले सजाइएको छ भने विशेष पूजा, हवन, रामायण पाठ र भजन–कीर्तन कार्यक्रम दिनभर सञ्चालन भइरहेका छन् ।
सरयू नदीमा स्नान गर्ने भक्तजनहरूको पनि ठूलो भीड देखिएको छ । भक्तजनको अत्यधिक उपस्थिति मध्यनजर गर्दै भारतीय प्रशासनले कडा सुरक्षा व्यवस्था, ट्राफिक नियन्त्रण र स्वास्थ्य सेवा तयारी अवस्थामा राखेको जनाएको छ ।
रामनवमीको अवसरमा जनकपुर र अयोध्यामा देखिएको भक्तजनको उत्साहले भगवान राम प्रतिको आस्था र श्रद्धालाई प्रष्ट रूपमा झल्काएको छ । यी दुई धार्मिक स्थलबीचको ऐतिहासिक र सांस्कृतिक सम्बन्धले पर्वको महत्वलाई अझ विशेष बनाउँदै आएको छ, जसले समाजमा धर्म, मर्यादा र सदाचारको सन्देश फैलाउने विश्वास गरिन्छ ।
आफ्नो प्रतिकृया दिनुहोस्