जनकपुरधाम । मिथिलाञ्चलमा आज (मंगलबार) कोजाग्रत पूर्णिमा धार्मिक आस्था र परम्परागत रौनकका साथ मनाइँदै छ। दशैं सकिने पूर्णिमाको रातलाई कोजाग्रत भनिन्छ र यस दिन देवी लक्ष्मीको आराधना गर्दै रातभर जाग्राम बस्ने चलन छ।
यस अवसरमा जनकपुरधाम स्थित जानकी मन्दिरमा विशेष पूजाअर्चना तथा कार्यक्रमको आयोजना गरिएको छ। महन्त राम तपेश्वर दासका अनुसार आजको दिन महोत्तरीको रतौली गाउँबाट पुस्तौ–पुस्ता देखि निरन्तर चल्दै आएको भार (कोसेली) पठाउने परम्परा यस वर्ष पनि दोहोरिएको छ।
रतौलीका स्व. महेन्द्र ठाकुरले सयौं वर्षअघि सुरु गरेको यस परम्परा अनुसार उनको वंशजका तीन घरबाट आज पनि दही–च्यूरा, फलफूल, विभिन्न परिकार, पान, मखान, मिठाई तथा लत्ता–कपडा जानकी मन्दिरमा अर्पण गरिएको छ। ठाकुर परिवारले माता सीतालाई छोरी मानी बिहेको परम्परा अनुसार कोसेली पठाउँदै आएको जनाइएको छ।
आज राति जानकी मन्दिरमा माता सीताको विशेष पूजाअर्चना, नाचगान र आरतीको कार्यक्रम हुनेछ। मन्दिरमा चढाइएको कोसेली प्रसादका रूपमा भक्तजनलाई वितरण गरिनेछ। साथै, परम्परा अनुसार माता जानकीको प्रतिमालाई गर्भगृहबाट बाहिर निकालेर दर्शन गराइने तयारी छ।
कोजाग्रत पूर्णिमाको दिन लक्ष्मीपूजा गर्ने र रातभर जाग्राम बसेर धनधान्य प्राप्तिको कामना गर्ने धार्मिक विश्वास छ। त्रेतायुगमा भगवान श्रीकृष्णले यसै दिन रासलीला प्रारम्भ गरेको र चन्द्रमाले चकोरलाई अमृत वर्षा गर्ने विश्वास पनि रहि आएको छ।
मिथिलाञ्चलमा यस दिन विशेष गरी मखानको खीर बनाएर छतमा राख्ने परम्परा छ। मध्यरातमा अमृत वर्षा हुन्छ भन्ने विश्वासका साथ राखिएको खीर बिहान प्रसादका रूपमा परिवारका सदस्यले ग्रहण गर्ने प्रचलन छ।
आज जनकपुरधाम सहित सम्पूर्ण मिथिला क्षेत्रका घर–घरमा दीप प्रज्वलन, पूजा र जाग्राम गरी कोजाग्रत पूर्णिमा उल्लासपूर्वक मनाइँदै छ।
आफ्नो प्रतिकृया दिनुहोस्