उपमहानगरपालिका मुकदर्शक, आगलागीको जोखिम बढ्दो
२३ पुष,जनकपुरधाम : जनकपुरधाम उपमहानगरपालिका क्षेत्र भित्र बिना कुनै इजाजत फुसको छाना प्रयोग गरी सञ्चालन गरिएका चिया तथा कफी क्याफेहरूको संख्या दिन-प्रतिदिन बढ्दै गएको छ। मुख्य सडक, बस्ती नजिक तथा सार्वजनिक स्थानहरूमा यस्ता क्याफेहरू खुलेआम सञ्चालनमा रहेका छन्, जसले सुरक्षा चुनौती थपिएको छ।
फुस, पराल र काठ जस्ता सजिलै बल्ने सामग्री प्रयोग गरिएका यी क्याफेहरू विशेष गरी युवा–युवतीहरूका लागि आकर्षक केन्द्र बन्दै गएका छन्। ग्रामीण शैली, प्राकृतिक वातावरण र सस्तो मूल्यका कारण दैनिक रूपमा ठूलो संख्यामा युवाहरू यहाँ भेला हुने गरेका छन्। तर आकर्षण सँगै जोखिम पनि उत्तिकै बढ्दै गएको छ।
खुला आगो, ग्यास चुलो तथा विद्युत् तारको अव्यवस्थित प्रयोगले कुनै पनि बेला आगलागी हुन सक्ने अवस्था रहेको छ। अधिकांश क्याफेहरूमा आगो निभाउने उपकरण, आपतकालीन निकास वा सुरक्षा मापदण्डको पालना भएको देखिँदैन।
स्थानीयवासीहरूको भनाइमा यस्ता क्याफेहरू धेरैजसो दर्ता, नक्सापास र अनुमतिविना सञ्चालन भइरहेका छन्। “युवाहरूको भीड हुने यस्ता स्थानमा सानो दुर्घटनाले ठूलो मानवीय क्षति हुन सक्छ,” एक स्थानीय बासिन्दा कैलाश महतोले चिन्ता व्यक्त गरे।
यस अवस्थामा स्थानीय प्रशासन तथा जनकपुरधाम उपमहानगरपालिकाले तत्काल अनुगमन गरी सुरक्षा मापदण्ड कडाइका साथ लागू गर्नुपर्ने आवश्यकता देखिएको छ। अनुमति बिना सञ्चालन भएका फुसका छानायुक्त क्याफेहरूलाई व्यवस्थित गर्न वा वैकल्पिक सुरक्षित संरचनामा सार्न ढिलाइ गरिए भविष्यमा ठूलो दुर्घटना निम्तिन सक्ने स्थानीयहरूको चेतावनी रहेको छ।
आफ्नो प्रतिकृया दिनुहोस्