७ चैत,जनकपुर : नेपाली राजनीतिका शिखर पुरुष एवं नेपाली कांग्रेसका पूर्व सभापति स्वर्गीय गिरिजाप्रसाद कोइरालाको १६औँ स्मृति दिवसका अवसरमा नेपाल तरुण दल केन्द्रीय समितिले उनीप्रति भावपूर्ण श्रद्धाञ्जली अर्पण गरेको छ। समितिको आधिकारिक सन्देशमा कोइरालाले नेपालको लोकतन्त्र स्थापना, पुनःस्थापना र सुदृढीकरणका लागि पुर्याएको अतुलनीय योगदानको स्मरण गर्दै उनी सधैँका लागि प्रेरणाको स्रोत रहने उल्लेख गरिएको छ।
कठिन भन्दा कठिन परिस्थितिमा पनि विचलित नभई अघि बढ्ने उनको दृढ इच्छाशक्ति र विशिष्ट नेतृत्व शैलीलाई तरुण दलले अनुकरणीय मानेको छ। विशेष गरी २०६२/०६३ को ऐतिहासिक जनआन्दोलनमा कोइरालाले खेलेको नेतृत्वदायी भूमिकाले नै निरंकुश शासनको अन्त्य गरी मुलुकलाई लोकतान्त्रिक गणतन्त्रको मार्गमा डोर्याएको सन्देशमा चर्चा गरिएको छ।
देशलाई शान्ति र राजनीतिक स्थायित्वको बाटोमा ल्याउन कोइरालाले निर्वाह गरेको अभिभावकीय भूमिकालाई उच्च सम्मानका साथ स्मरण गर्दै तरुण दलले वर्तमान लोकतान्त्रिक व्यवस्थामा उनको योगदान सधैँ अविस्मरणीय रहने जनाएको छ। उनी लोकतन्त्रका एक अथक योद्धाका रूपमा नेपाली इतिहासमा सदा जीवित रहने विश्वास समेत व्यक्त गरिएको छ।
आफ्नो प्रतिकृया दिनुहोस्