काठमाडौँ,२८ असार : राष्ट्रपति विद्यादेवी भण्डारीले राष्ट्रिय सभाको चालु अधिवेशन आज राति १२ बजेदेखि लागू हुने गरी अन्त्य गर्नुभएको छ । नेपालको संविधान बमोजिम राष्ट्रपति भण्डारीले मन्त्रिपरिषद्को सिफारिसमा अधिवेशन अन्त्य गर्नुभएको हो । राष्ट्रियसभाको आजको बैठकले असार २९ गते दिनको ३ बजे बस्ने गरी निर्धारण भएको बैठकसमेत स्वतः अन्त्य भएको संघीय संसद् सचिवालयका महासचिव डा. भरतराज गौतमद्वारा जारी सूचनापत्रमा उल्लेख छ ।
राष्ट्रियसभाको चालु आठौँ अधिवेशन यही असार १७ गते आह्वान भएको थियो । अधिवेशनका क्रममा बसेको छ वटा बैठकमा सांसदहरुले मुलुकको समसामयिक राजनीतिक स्थिति, बाढीपहिरो र कोभिड–१९ लगायत जनचासोका विषयमा सरकारको ध्यानाकर्षण गराउनुभएको थियो ।(रासस)
आफ्नो प्रतिकृया दिनुहोस्