७ चैत्र,(आशिष कुमार),जनकपुरधाम: धनुषाको हंसपुर नगरपालिकामा नेकपा माओवादी केन्द्रका नेता तथा कार्यकर्ताहरूले तीन दिनदेखि नगरपालिकाको कार्यालयमा तालाबन्दी गर्दै धर्ना जारी राखेका छन्।
उनीहरूले वडा नम्बर–६, सोनिगामा स्थित सामुदायिक विद्यालय परिसरमा घर निर्माण गरी कब्जा गरिएको भन्दै उक्त संरचना हटाउन माग गरेका छन्। विद्यालय परिसर खाली गराउने विषयमा कार्यपालिकाले गरेको निर्णय तत्काल कार्यान्वयन गर्नु पर्ने भन्दै माओवादी कार्यकर्ताहरूले मेयर प्रदीप यादवलाई ज्ञापनपत्र बुझाएका थिए। तर, मेयर यादवले तत्काल निर्णय लागू गर्न अस्वीकार गरे पछि उनीहरूले अनिश्चितकालीन धर्ना सुरु गरेका हुन्।
धर्नामा रहेका माओवादी कार्यकर्ताहरूले विद्यालय परिसर खाली गराउने सहमति भए मात्र तालाबन्दी खोल्ने बताएका छन्। तर, सहमति नजुट्दा नगरपालिकाको प्रशासनिक कामकाज प्रभावित भएको छ। कार्यपालिका सदस्य तथा स्थानीय नेता राजेश सक्सेनाले कार्यपालिकाको निर्णय कार्यान्वयन नगरिएको भन्दै धर्ना दिन बाध्य भएको बताएका छन्।
यसैबीच, मेयर यादव र माओवादी कार्यकर्ताहरूबीच केही चरणको वार्ता भए पनि सहमति जुट्न सकेको छैन। माओवादी नगर कमिटीले ३० बुँदे माग सहित नगरपालिकालाई ज्ञापनपत्र बुझाएको छ। यदि विद्यालय परिसर खाली गराउने निर्णय कार्यान्वयन नभए, आन्दोलनलाई अझ सशक्त बनाउने चेतावनी माओवादी कार्यकर्ताहरूले दिएका छन्।
आफ्नो प्रतिकृया दिनुहोस्