जनकपुर । धनुषाका प्रहरी प्रमुख (एसपी) नरहरी रेग्मीको राजीनामा माग गर्दै जनकपुरधाम उपमहानगरपालिका–२० रुपेठाका स्थानीयवासीहरूले बुधबार जनकपुरधामको जनक चोकमा धर्ना दिएका छन् ।हिन्दू समुदायका महिला र पुरुषहरू सहभागी भएको उक्त धर्नामा “धनुषाका एसपी राजीनामा दे”, “हिन्दूहरुलाई रिहा गर”, “हिन्दूहरुलाई फसाउन पाइँदैन” भन्ने नारा सहितका प्लेकार्ड प्रदर्शन गरिएको थियो ।
केही दिन अघि दुर्गा भगवतीको मूर्ति विसर्जनका क्रममा रुपेठामा हिन्दू र मुस्लिम समुदाय बीच विवाद भएको थियो । सो क्रममा मुस्लिम समुदायले विसर्जन गर्न गएका व्यक्तिमाथि सिसाको बोतल र ढुंगामुढा प्रहार गरेको स्थानीयहरूले आरोप लगाएका छन् । त्यस पछि आक्रोशित हिन्दू समुदायले मुस्लिम पक्षले निर्माण गरेको टहरामा आगजनी गरेका थिए ।
स्थिती नियन्त्रणमा लिन धनुषा प्रहरीले अश्रुग्यास प्रहार गर्नुका साथै केही स्थानीयलाई नियन्त्रणमा लिएको थियो । तर नियन्त्रणमा लिइएका मध्ये निर्दोष किशोर र युवा रहेको दाबी गर्दै हिन्दूवादी संगठनका अगुवाहरूले लगातार प्रदर्शन गर्दै आएका छन् । उनीहरूले पक्राउ परेकालाई बिना शर्त रिहा गर्न माग गरेका छन् ।
आफ्नो प्रतिकृया दिनुहोस्