जेनजी परिवारका माग: मृतकलाई सहिद घोषणा र क्षतिपूर्तिको व्यवस्था गरिनु पर्छ

२७ भदौ,काठमाडौं । जेनजी आन्दोलनका क्रममा ज्यान गुमाएका युवाका परिवारहरूले सरकारसँग न्यायको माग गरेका छन्। शुक्रबार काठमाडौंमा “हामीलाई न्याय चाहियो” भन्ने नारा सहित उनीहरूले प्रदर्शन गर्दै आफ्ना मागहरू सार्वजनिक गरेका हुन्।

भदौ २३ गते राज्य पक्षद्वारा भएको अन्धाधुन्ध गोली प्रहारमा एकै दिन १९ जनाको ज्यान गएको थियो। त्यस घटनामा ज्यान गुमाएका मध्ये एक युवकका परिवार सदस्य रत्नमाया महर्जनले मृतकलाई सहिद घोषणा गर्दै उचित क्षतिपूर्ति दिनुपर्ने माग राखिन्। उनले माग पूरा नभएसम्म शव नबुझ्ने चेतावनी दिइन्। “बच्चा गइसक्यो, अब शव भएपनि उठाउनु पर्छ। त्यसैले सहिद घोषणा गरेर क्षतिपूर्तिको व्यवस्था हुनु जरुरी छ,” महर्जनले भनिन्।

त्यस्तै, अर्का पीडित परिवारका सदस्य कमल सुवेदीले आन्दोलनमा प्राण गुमाउनेहरूको खोजी र उपचारतर्फ राज्य उदासीन देखिएको भन्दै आक्रोश प्रकट गरे। “मृत्यु भएको पाँच दिन भइसके पनि शव व्यवस्थापनमा ध्यान दिइएको छैन। घाइतेको उपचार तर्फ समेत सरकार गम्भीर छैन। देशको नेतृत्व कसलाई दिने भन्ने बहसमा समय खर्च भइरहेको छ तर रगत बगाउनेहरूको खोजी किन भइरहेको छैन?” सुवेदीले प्रश्न उठाए।

मृतक उमेश महतकी दिदी सुमित्रा महतले भाइको निधनले आफूलाई गहिरो पीडा दिएको बताउँदै, यस्तो पीडा अरूले भोग्न नपरोस् भन्ने कामना गरिन्। उनले आफ्ना भाइको बलिदानलाई खेर जान नदिन आग्रह गरिन्।