८ फागुन, जनकपुरधाम: मधेस प्रदेश अन्तर्गतका स्वास्थ्य संस्थामा कार्यरत स्वास्थ्यकर्मी हरूले स्तर वृद्धिको माग गर्दै आज जनकपुरधाम स्थित प्रदेश सभा भवन अगाडि प्रदर्शन गरेका छन्।
स्वास्थ्यकर्मी हरूले ब्यानर र प्लेकार्ड बोकेर आफ्नो माग प्रति ध्यानाकर्षण गराएका थिए। सिनियर अहेव र सिनियर अनमी (पाँचौँ तह)का कर्मचारी संघर्ष समिति, मधेस प्रदेश को आयोजनामा उक्त प्रदर्शन गरिएको हो।
सरकारले बढुवा रोके पछि विरोध
संघर्ष समितिका कोषाध्यक्ष रुपेश साह का अनुसार, प्रदेशका आठ जिल्लामा कार्यरत करिब १,८०० स्वास्थ्यकर्मीहरूको बढुवा प्रक्रिया मधेस सरकारले रोकिदिएको कारण नियमित बढुवाको माग गर्दै प्रदर्शन गरिएको हो।
उनले बताए अनुसार, पटक–पटक बढुवाको माग गर्दा पनि सुनुवाइ नभए पछि मुख्यमन्त्री कार्यालय, जिल्ला प्रशासन कार्यालय धनुषा हुँदै मुरली चोकमा जुलुस निकालेर प्रदेश सभा भवन अगाडि कोणसभा गरिएको थियो।
सभामुख लाई तीन बुँदे ज्ञापनपत्र
प्रदर्शनका क्रममा प्रदेशसभाका सभामुख रामचन्द्र मण्डललाई तीन बुँदे ज्ञापनपत्र बुझाइएको छ। ज्ञापनपत्रमा निम्न मागहरू समेटिएका छन् ।(नेपाल स्वास्थ्य सेवा ऐन, २०५३ अनुसार विगत देखि पाउँदै आएको दुई तहको स्तरवृद्धि लागू गर्नु पर्ने,स्वास्थ्य सेवामा प्रथम प्रवेश बिन्दु चौथो तह भएकाले खुला प्रतिस्पर्धा बाट पदपूर्ति १००% गर्नु पर्ने।)
यसै बीच, प्रदेश सभाको बैठक रहेको कारण प्रदेशसभा भवन वरपर सुरक्षा व्यवस्था कडा पारिएको थियो।
आफ्नो प्रतिकृया दिनुहोस्