जनकपुरधाम। जनता समाजवादी पार्टी (जसपा) नेपालका जिल्ला तथा मधेश प्रदेशका पदाधिकारी, नेता तथा कार्यकर्ताले सरकार विरुद्धको विरोध प्रदर्शनलाई तेस्रो दिन पनि निरन्तरता दिएका छन् । बुधबार जनकपुरधामको भानुचोकमा सडक अवरुद्ध गर्दै उनीहरूले प्रधानमन्त्री केपी शर्मा ओलीको पुतला दहन गरेका हुन् ।
प्रदर्शनकारीहरूले “ओली सरकार मुर्दावाद”, “झुट्टा मुद्दा खारेज गर” र “गौर हत्याकाण्डका योजनाकार प्रभु साहलाई कारबाही गर” जस्ता नारा समेत लगाएका थिए ।जसपा नेपालका मधेश प्रदेश संसदीय दलका प्रमुख सचेतक एवम् प्रदेशसभा सदस्य रामअशिष यादवले सरकारले षड्यन्त्रपूर्वक जसपा अध्यक्ष उपेन्द्र यादव लाई गौर हत्याकाण्डमा फसाउने प्रयास गरेको आरोप लगाए ।
उनका अनुसार कांग्रेस र एमाले मिलेर यादवलाई फसाउने खेल भइरहेको छ ।यादवले भने, “यदि सरकारले उपेन्द्र यादव विरुद्धको मुद्दा फिर्ता लिएन भने हामी अझ सशक्त आन्दोलनमा उत्रिनेछौं ।” यस अघि, सोमबार सर्वोच्च अदालतका न्यायाधीश तिल प्रसाद श्रेष्ठ र नित्यानन्द पाण्डेको इजलासले गौर हत्याकाण्ड सम्बन्धी अनुसन्धान अघि बढाउन परमादेश जारी गरेको थियो ।
०६३ साल चैत ७ गते रौतहटको गौरमा मधेशी जनअधिकार फोरम र माओवादीबीचको झडपमा २८ जना माओवादी कार्यकर्ताको ज्यान गएको थियो ।
आफ्नो प्रतिकृया दिनुहोस्