काठमाडौं : प्रधान सेनापति प्रभुराम शर्माले, बेलायतमा भएको प्रतिस्पर्धात्मक एक्सरसाइज ‘क्याम्ब्रियन पेट्रोल’मा सहभागीलाई प्रमाणपत्र वितरण गरेका छन् ।बेलायतको वेल्स, ब्रेकनस्थित सनेब्रिज ट्रनिङ एरियामा संचालन भएको सञ्चालन भईरहेको तालिममा सहभागि नेपाली सेना लगायत क्यानडा, मेसोडोनिया, कतार, फिलिपिन्स र बेलायती सेनाका टोलीहरूलाई प्रधान सेनापतिले पदक तथा प्रमाण–पत्र वितरण गरेका हुन् ।
यहि असोज १९ गते आरम्भ भएको प्रतिस्पर्धात्मक अभ्यासमा सहभागी नेपाली सेनाको टोलीले रजत पदक प्राप्त गरेको छ ।सो अभ्यासमा विशेष गरी पैदल फौजको पेसागत ज्ञान, सीप, रण कौशल, शारीरिक सहिष्णुताका साथै व्यक्तिगत एवं सामूहिक रूपमा गरिने फौजी कारबाहीको स्तर जाँच तथा मूल्याङ्कन गरिन्छ ।
अभ्यासमा भाग लिने टोलीले ४८ घण्टाको समयावधि भित्र हतियार तथा ३२ के.जी. तौल बराबरको उपकरण एवं बन्दोबस्ती सामाग्री सहित करिब ६५ किलोमिटरको दुरी पुरा गर्नु पर्दछ । अभ्यासमा ७५ प्रतिशत भन्दा बढी अङ्क प्राप्त गर्ने टिमलाई स्वर्ण पदक, ६५ देखि ७४.९ प्रतिशत अङ्क प्राप्त गर्ने टिमलाई रजत पदक र ५५ देखि ६४.९ प्रतिशत अङ्क प्राप्त गर्ने टिमलाई कांस्य पदक प्रदान गरिन्छ ।
सन् १९६० बाट वार्षिक रूपमा बेलायतमा सञ्चालन हुँदै आएको अन्तर्राष्ट्रिय स्तरको यस प्रतियोगितामा नेपाली सेनाले सन २०१४ बाट भाग लिँदै आएको छ ।यस वर्षको अभ्यासमा विभिन्न ३१ राष्ट्रका ३८ वटा अन्तर्राष्ट्रिय टिमका साथै कुल १११ वटा टिम सहभागी छन् ।
हालसम्म नेपाली सेनाको टोलीले उक्त प्रतिस्पर्धात्मक अभ्यासमा २ स्वर्ण, ३ रजत र २ कांस्य गरी कुल ७ पदक प्राप्त गरिसकेको नेपाली सेनाले जनाएको छ ।
आफ्नो प्रतिकृया दिनुहोस्