२५ बैशाख,काठमाडौं: राजसंस्था पुनःस्थापनाको माग गर्दै गठित नवराज सुवेदी नेतृत्वको संयुक्त जनआन्दोलन समितिले जेठ १५ गते देखि अनिश्चितकालीन आन्दोलन शुरु गर्ने घोषणा गरेको छ। समितिले बिहीबार पत्रकार सम्मेलन गर्दै आन्दोलनको औपचारिक घोषणा गरेको हो।
समितिले तीन मुख्य मागहरू अघि सारेको छ:
१) परिवर्तनकारी र परम्परागत शक्ति बीच समन्वय कायम गर्दै राजसंस्था लाई समेट्ने नयाँ राष्ट्रिय समझदारी, २) सर्वधर्म समभाव सहितको पूर्ण धार्मिक स्वतन्त्रता कायम गर्दै हिन्दू राष्ट्र पुन:स्थापना, ३) बलियो स्थानीय सरकारको निर्माण।
घोषणा कार्यक्रममा बोल्दै सुवेदीले आन्दोलन शान्तिपूर्ण हुने स्पष्ट पार्दै भने, “हाम्रो आन्दोलन भद्र अवज्ञा र सत्याग्रहमा आधारित हुनेछ। राजा र जनता बीच षड्यन्त्रपूर्वक तोडिएको सम्बन्ध पुन: जोड्ने हाम्रो उद्देश्य हो।”
समितिले जारी गरेको विज्ञप्तिमा आन्दोलन सरकार विरुद्ध नभई जनताको सार्वभौम अधिकार र निर्णायक क्षमताको सुदृढीकरणतर्फ लक्षित रहेको उल्लेख छ। साथै, परिवर्तनकारी शक्तिहरूको सहकार्यमा संविधानको दायरा भित्रै आफ्ना मागहरू सम्बोधन हुन सक्ने सम्भावना खुला राखिएको छ।
यस आन्दोलनलाई राप्रपा, राप्रपा नेपाल लगायतका विभिन्न राजनीतिक दल तथा नागरिक समूहहरूले समर्थन जनाएका छन्।
आफ्नो प्रतिकृया दिनुहोस्