१७ माघ,काठमाडौं। नेपाली कांग्रेसका सभापति गगन कुमार थापाले काठमाडौं क्षेत्र–४ का पार्टी कार्यकर्ता प्रति आभार व्यक्त गर्दै आफूलाई यहाँ सम्म पुर्याउन उनीहरूको साथ, भरोसा र योगदान निर्णायक रहेको बताएका छन्।
शनिबार आयोजित पार्टीको निर्वाचन परिचालन मूल समिति घोषणा कार्यक्रममा बोल्दै थापाले २०७० सालमा पहिलो पटक प्रत्यक्ष निर्वाचन जित्ने लक्ष्य सहित काठमाडौं क्षेत्र–४ बाट उम्मेदवारी दिएको अनुभव स्मरण गरे।
उनले २०७४ सालको निर्वाचन कठिन परिस्थितिमा सम्पन्न भएको उल्लेख गर्दै त्यति बेला नेकपा एमाले र माओवादी एक भएर चुनावी मैदानमा उत्रिँदा पनि संसद् पुगेर काम गर्ने अवसर पाएको बताए।
थापाले भने,“त्यो समय निकै चुनौतीपूर्ण थियो। एमाले–माओवादी गठबन्धन थियो र कांग्रेस केवल २३ स्थानमा मात्र विजयी भएको थियो। म डराएको थिएँ, तर तपाईंहरूले दिएको हौसलाले नै म संसद् पुगेँ। त्यो अवसर नपाएको भए म महामन्त्रीको जिम्मेवारीमा स्थापित हुन सक्दिनथेँ।”
आफूले यसपटक काठमाडौं छाडेर सर्लाही क्षेत्र–४ रोज्नु सजिलो निर्णय नभएको बताउँदै उनले भावुक हुँदै भने, “यसपटक काठमाडौं सहज थियो। तर पहिलो पटक काठमाडौंबाट उम्मेदवारी नदिएर सर्लाही जाने निर्णय गरेको छु। धेरै वर्ष पछि मन रोयो। प्राय: आँसु लुकाउन सकिन्छ, तर यसपटक चाहेर पनि सकिन। यो ठाउँ छाड्दा मन भित्र गहिरो पीडा थियो।”
थापाले आफ्नो राजनीतिक यात्रामा पार्टी कार्यकर्ताको भूमिका अत्यन्तै महत्वपूर्ण रहेको उल्लेख गर्दै आगामी निर्वाचनलाई केन्द्रमा राखेर संगठन सुदृढ बनाउन सबैलाई एकताबद्ध भएर लाग्न आग्रह गरे।उनले आगामी स्थानीय तह र प्रदेशसभा निर्वाचन अघि नेपाली कांग्रेसको १५औँ महाधिवेशन सम्पन्न हुने जानकारी दिँदै पार्टी भित्र उम्मेदवार छनोट प्रक्रिया पनि परिवर्तन हुने बताए।
“अब नयाँ स्थानीय र प्रदेश निर्वाचन भन्दा अगाडि पार्टीको महाधिवेशन हुन्छ,” थापाले भने,“र त्यस पछि कांग्रेसमा उम्मेदवारको टिकट वडास्तर बाटै‘प्राइमरी इलेक्सन’मार्फत चयन गरिनेछ।”उनले अब कांग्रेसमा टिकट पाउन सभापति वा महामन्त्रीको घर धाउनुपर्ने अवस्था अन्त्य हुने दाबी समेत गरे।
आफ्नो प्रतिकृया दिनुहोस्