७ फागुन ,रौतहट ।नेपाली राजनीतिको एउटा लामो कालखण्ड सम्हाल्नु भएका पूर्वप्रधानमन्त्री एवं नेपाली कम्युनिष्ट पार्टीका सह–संयोजक माधव कुमार नेपालले सक्रिय चुनावी राजनीतिबाट विश्राम लिने अप्रत्याशित घोषणा गर्नु भएको छ। बिहीबार आफ्नै गृहजिल्ला रौतहटको गौरमा पत्रकारहरूसँगको भेटघाटमा उहाँले आगामी दिनमा कुनै पनि तहको निर्वाचनमा उम्मेदवार नबन्ने आफ्नो दृढ मनस्थिति रहेको प्रष्ट पार्नु भयो।
हाल रौतहट क्षेत्र नम्बर १ बाट प्रतिनिधि सभा सदस्यको चुनावी मैदानमा रहनु भएका नेता नेपालले यस पटकको निर्वाचन नै आफ्नो लागि अन्तिम प्रतिस्पर्धा हुने बताउँदै अन्तरात्माको आवाज सुनेर यो निर्णयमा पुगेको उल्लेख गर्नुभयो।चुनावी राजनीतिबाट अलग भएपछिको आफ्नो भावी योजनाका बारेमा पनि उहाँले खुलस्त कुराकानी गर्नु भएको छ।
शक्ति र पदको दौडबाट बाहिरिए पछि बाँकी समय अध्ययन, लेखन, देश–विदेशको भ्रमण र समाजसेवाका कार्यहरूमा व्यतीत गर्ने उहाँको योजना छ। यो घोषणाले राजनीतिक वृत्तमा तरङ्ग पैदा गरेको छ, जसलाई कतिपयले पुस्तान्तरणको सङ्केतका रूपमा हेरेका छन् भने कतिपयले यसलाई उहाँको राजनीतिक जीवनको एउटा नयाँ मोडका रूपमा लिएका छन्।
सोही अवसरमा उहाँले आफूमाथि लाग्दै आएका आरोपहरूको पनि खण्डन गर्नु भयो। विशेष गरी पतञ्जली जग्गा प्रकरणमा आफ्नो संलग्नता रहेको विषयलाई उहाँले पूर्णत:राजनीतिक प्रतिशोधको संज्ञा दिनुभयो। नेकपा एमालेका अध्यक्ष केपी शर्मा ओलीले आफूलाई राजनीतिक रूपमा समाप्त पार्ने नियतले यस्तो षड्यन्त्र बुनेको दाबी गर्दै उहाँले ओलीको कार्यशैली संकुचित रहेको र उनले आफ्नो विरोध गर्ने जोकोहीलाई पनि निसाना बनाउने गरेको टिप्पणी गर्नुभयो।
हाल उनी विरुद्ध विशेष अदालतमा पतञ्जली योगपीठको जग्गा सम्बन्धी भ्रष्टाचार मुद्दा विचाराधीन छ। यस्तो कानुनी जटिलता र चुनावी चटारोका बीच आएको उहाँको सन्न्यासको घोषणाले आगामी निर्वाचनको नतिजा र रौतहटको राजनीतिमा कस्तो प्रभाव पार्ला भन्ने चासो सर्वत्र बढेको छ।
आफ्नो प्रतिकृया दिनुहोस्