२ चैत,जनकपुरधाम : C. K. Raut ले संसदीय राजनीतिबाट विश्राम लिने घोषणा गरेका छन्। उनले सामाजिक सञ्जाल मार्फत सार्वजनिक गरेको विज्ञप्तिमा आफूले संसदीय राजनीतिक गतिविधिबाट पछि हट्ने निर्णय गरेको जानकारी दिएका हुन्।
यद्यपि, उनले राजनीतिक संघर्ष भने निरन्तर जारी रहने स्पष्ट पारेका छन्। विज्ञप्तिमा उनले संसदीय राजनीतिबाट विश्राम लिए पनि देश र जनताको मुद्दाका लागि संघर्षको राजनीति जारी राख्ने बताएका छन्। साथै, पार्टीलाई आवश्यकता परेसम्म नेतृत्व गर्दै अगाडि बढ्ने प्रतिबद्धता पनि व्यक्त गरेका छन्।
C. K. Raut ले आफ्नो व्यक्तिगत इच्छा विपरीत दुई पटक संसदीय निर्वाचन लडेको उल्लेख गरेका छन्। उनका अनुसार एक पटक उनले विजय हासिल गरे भने अर्को पटक पराजय भोगे। तर दुवै पटक निर्वाचनमा सहभागी भएको निर्णयप्रति आफू सन्तुष्ट रहेको बताएका छन्।
२०७९ सालको आमनिर्वाचनका क्रममा आफू उम्मेदवार नबन्ने सोच भए पनि पार्टीका संस्थापक अध्यक्षको हैसियतमा पार्टीलाई सफलतापूर्वक निर्वाचन प्रक्रियामा सहभागी गराउने उद्देश्य रहेको उनले बताए।
त्यस्तै, फागुन २१ गते सम्पन्न निर्वाचनमा पनि आफू उम्मेदवार नबन्ने तयारीमा रहेको भए पनि अन्तिम समयमा कार्यकर्ताको मनोबल कमजोर नहोस् भन्ने उद्देश्यले चुनावी मैदानमा उत्रिएको उनले उल्लेख गरेका छन्।
उनले लामो समय देखि संसदीय तथा पदको राजनीतिबाट विश्राम लिने अवसर खोजिरहेको बताए। २०८२ सालको निर्वाचन नलड्ने निर्णय लगभग पक्का भए पनि साथीभाइको सुझावलाई सम्मान गर्दै उम्मेदवारी दिएको र त्यसलाई सही निर्णय भएको अनुभूति भएको उनले बताएका छन्।
आफ्नो प्रतिकृया दिनुहोस्