३ चैत,काठमाडौं ।राष्ट्रिय स्वतन्त्र पार्टी (रास्वपा) बाट समानुपातिक सांसद निर्वाचित भएकी भूमिका श्रेष्ठले संसदमा आफ्नो प्रवेश सँगै जिम्मेवारी थपिएको महसुस गरेकी छन्। नेपालको संसदीय इतिहासमै लैङ्गिक तथा यौनिक अल्पसङ्ख्यक समुदायबाट ट्रान्सजेन्डर महिलाका रूपमा पहिलो पटक प्रतिनिधित्व गरेकी श्रेष्ठले अबको कार्यकाल समुदायका मुद्दा र सुशासनका लागि समर्पित गर्ने प्रतिबद्धता जनाइन्।
संवाददाता संगको कुराकानीमा उनले रास्वपाको समावेशी सिद्धान्त र सुशासन प्रतिको अडानकै कारण आफूले यो पार्टी रोजेको स्पष्ट पारिन्। संविधानको धारा १२, १८ र ४२ मा आफ्नो समुदायका हक-अधिकार लेखिए पनि उचित संयन्त्र र कानुनको अभावमा ती कार्यान्वयन हुन नसकेको उनको ठम्याइ छ। त्यसैले, आवश्यक नियम-कानुन निर्माणमा सहयोग पुर्याउनु र समुदायको आवाजलाई सदन सम्म पुर्याउनु लाई उनले आफ्नो मुख्य एजेन्डा बनाएकी छन्।
श्रेष्ठका अनुसार उनको लडाइँ केवल यौनिक अल्पसङ्ख्यकका लागि मात्र नभई मधेसी, मुस्लिम, अपाङ्गता भएका व्यक्ति र पिछडिएका वर्गका मुद्दा समेत सम्बोधन गराउनु हो। शिक्षा, स्वास्थ्य, रोजगारी, नागरिकताको समस्या र वैवाहिक समानता जस्ता विषयलाई आगामी पाँच वर्षमा तार्किक निष्कर्षमा पुर्याउने उनको लक्ष्य छ।
लामो समय देखि अधिकारकर्मीका रूपमा सक्रिय उनले भविष्यमा मन्त्रालयको जिम्मेवारी पाएमा पनि पछि नहट्ने र रास्वपा नेतृत्वको सरकार मार्फत जनताका सेवामा लाग्ने दृढता व्यक्त गरिन्।
आफ्नो प्रतिकृया दिनुहोस्