२५ माघ ,सप्तरी । जनता समाजवादी पार्टी (जसपा)का अध्यक्ष उपेन्द्र यादवले कांग्रेस र कम्युनिस्ट दलहरूले देशमा सुशासन, विकास र समृद्धि कायम गर्न नसक्दा मुलुक असहज अवस्थामा पुगेको बताएका छन्।
सप्तरीको रुपनी गाउँपालिका–३ हर्दियामा शनिबार आयोजित चुनावी छलफल तथा भेटघाट कार्यक्रममा बोल्दै अध्यक्ष यादवले वर्तमान राजनीतिक र सामाजिक अवस्थाको जिम्मेवारी कांग्रेस र कम्युनिस्ट दलहरू माथि रहेको आरोप लगाए।
२०४६ सालको जनआन्दोलन पछि गठन भएका अधिकांश सरकारमा कांग्रेस र कम्युनिस्ट दलहरू सहभागी रहे पनि अपेक्षित सुशासन र विकास हुन नसकेको उनले उल्लेख गरे। उनले त्यसकै कारण युवा-पुस्तामा असन्तोष बढेको र देश अस्थिर परिस्थितिमा पुगेको बताए।
शिक्षा, स्वास्थ्य र उद्योग क्षेत्रलाई सुदृढ बनाउनुको सट्टा निजीकरण र पार्टीकरण गर्दा सरकारी संरचनाहरू कमजोर भएको यादवको आरोप छ। सप्तरी क्षेत्र नम्बर ३ का उम्मेदवार समेत रहेका उनले नेताहरूले चुनावका बेला गरेका प्रतिबद्धता पूरा नगरेको भन्दै मतदाताहरूले निरन्तर प्रश्न गर्नुपर्ने बताए।
“जनताले नेतासँग प्रश्न सोधिरहनु पर्छ, त्यसो गरे मात्र नेता जिम्मेवार हुन्छन्,” उनले भने।जसपाकै पहलमा देशमा परिवर्तन आएको दाबी गर्दै अध्यक्ष यादवले आफू र भावी पुस्ताको भविष्य सुरक्षित गर्न जसपाका उम्मेदवारलाई अत्यधिक मतले जिताउन मतदातासँग आग्रह गरे।
आफू सप्तरी २ बाट निर्वाचित भए पछि रामराजा प्रसाद सिंह स्वास्थ्य विज्ञान प्रतिष्ठान, कृषि विश्वविद्यालय, गजेन्द्रनारायण सिंह अस्पतालमा आधुनिक पूर्वाधार निर्माण, इन्जिनियरिङ तथा नर्सिङ कलेज भवन निर्माण, पक्की सडक विस्तार लगायत विकासका कामहरू सम्पन्न तथा प्रक्रियामा रहेको उनले बताए।
आफ्नो प्रतिकृया दिनुहोस्