१९ फागुन,जनकपुरधाम: १५ दिनसम्म सञ्चालन भएको मिथिला माध्यमिकी परिक्रमा आज अन्तःगृह परिक्रमासँगै विधिवत रूपमा सम्पन्न भएको छ। परिक्रमाको अन्तिम दिन जनकपुरधाममा परिक्रमा सहभागी, साधुसन्त र हजारौं श्रद्धालु भक्तजनले अन्त:गृह परिक्रमा गरी धार्मिक अनुष्ठान पूरा गरेका थिए।
हिजो साँझ जनकपुरधाम आइपुगेको डोला राति १२ बजेदेखि अन्त:गृह परिक्रमामा सहभागी भएको थियो। अन्त:गृह परिक्रमा अन्तर्गत जनकपुरधाम वरिपरि करिब पाँच कोस क्षेत्र पैदल यात्रा गर्नुपर्ने हुन्छ। मूल १५ दिने परिक्रमामा सहभागी हुन नसकेकाले अन्तःगृह परिक्रमा गरे पनि पूर्ण परिक्रमासँग बराबरी पुण्य प्राप्त हुने जनविश्वास रहेको छ।
यस वर्ष नेपाल र भारतका विभिन्न स्थानबाट लाखौं श्रद्धालु सहभागी भएका थिए। साधुसन्त, नागा बाबाहरू, महिला, पुरुष, युवा र युवतीहरूको उल्लेख्य उपस्थिति देखिएको थियो। स्थानीयवासीले भण्डारा, पानी र स्वास्थ्य सेवा सञ्चालन गरी यात्रुहरूको सहजता सुनिश्चित गरेका थिए।
धनुषाको मिथिला बिहारी नगरपालिकास्थित ठेरा कचुरीको मिथिला बिहारी मन्दिरबाट फागुन ८ गते भगवानको डोला निस्केपछि परिक्रमाको यात्रा सुरु भएको थियो। यात्रा अवधिभर नेपालमा १३ र भारतमा २ गरी कुल १५ विश्रामस्थलमा यात्रुहरू बसेका थिए। सहभागीहरूले नेपालतर्फ १०७ किलोमिटर र भारततर्फ २६ किलोमिटर गरी कुल १३३ किलोमिटर पैदल यात्रा गरेका थिए।
परिक्रमाले धार्मिक मात्र नभई सामाजिक सद्भाव, सांस्कृतिक एकता र नेपाल–भारतबीचको ऐतिहासिक सम्बन्धको प्रतीकको रूपमा महत्त्वपूर्ण योगदान पुर्याएको छ। स्थानीय प्रशासन, सुरक्षा निकाय र स्वयंसेवकहरूले सुरक्षा र व्यवस्थापनलाई प्रभावकारी बनाएका थिए। यस अवधिमा जनकपुरधाम तथा आसपासका क्षेत्रमा व्यापार, होटल, यातायात र पूजासामग्रीको बिक्रीमा उल्लेख्य वृद्धि देखिएको व्यवसायीहरूले बताएका छन्।
जनकपुरधाम उपमहानगरपालिकाले परिक्रमामा सहभागी श्रद्धालु र स्थानीयवासीहरूको सुविधा र स्वास्थ्य सुरक्षामा विशेष ध्यान दिएको थियो। उपमहानगरपालिकाले प्रमुख स्थलहरूमा नि:शुल्क शौचालयको व्यवस्था गरेको थियो भने परिक्रमा अवधिभर आयुर्वेद र अंग्रेजी औषधि निशुल्क वितरण गरिएको थियो। यी पहलहरूले परिक्रमामा सहभागीहरूलाई सहजता र स्वास्थ्य सुरक्षाको ग्यारेन्टी दिएको थियो।
तराईका अन्य जिल्लामा आज होली मनाइए पनि मिथिलाञ्चलमा पूर्णिमाको अघिल्लो दिन मात्र होली खेलिने परम्परा छ। सोही अनुसार जनकपुरधाममा भोलि रंग–अबीरसहित होली पर्व मनाइने छ। जनकपुरधाम उपमहानगरपालिकाको तर्फ बाट सबै परिक्रमा सहभागी, स्थानीयवासी र भक्तजनमा शुभकामना व्यक्त गर्दै धार्मिक आस्था, सांस्कृतिक निरन्तरता र सामाजिक सद्भावको विकासका लागि निरन्तर प्रयास जारी रहने विश्वास व्यक्त गरिएको छ।
आफ्नो प्रतिकृया दिनुहोस्