२४ चैत्र ,जनकपुरधाम: जनकपुरधामको बिहार कुण्ड स्थित सिया रघुनाथ सदन (मंदिर) को जग्गामा अवैधरूपमा निर्माण गरिएका संरचनाहरू हटाउने तयारी गरिएको छ। मन्दिरका वर्तमान महन्त नामदेव शरणले जिल्ला प्रशासन कार्यालय धनुषामा दिएको उजुरी पछि यो प्रकरण सतहमा आएको हो।
महन्तले दाबी गरे अनुसार, मन्दिरको जग्गामा विभिन्न व्यक्तिहरूले अतिक्रमण गरी घर बनाएका छन्। यो विषय जनकपुरधाम उपमहानगरपालिकामा उजुरी दर्ता गरिए सँगै मेयर मनोज साहले गोप्य रूपमा अनुसन्धान सुरु गरेका थिए।
तर छानबिनको क्रममा चकित पार्ने खुलासा भएको छ। मन्दिरका महन्त नामदेव शरण आफैंले ती अतिक्रमणकारीहरू बाट लाखौं रुपैयाँ असुलेको भिडियो तथा करारनामा सार्वजनिक भएको छ। उनले झूटा विवरण पेश गर्दै स्थानीय निकाय तथा प्रशासन लाई गुमराहमा पारेर जग्गा अतिक्रमण गराउने र त्यसबाट लाभ लिने काम गरेका थिए।
उक्त षड्यन्त्रमा महन्तका भारतीय नातेदार भवेश झा र अन्य केही व्यक्ति संलग्न रहेको पाइएको छ। भवेश झा नक्कली नेपाली नागरिकता बनाइ अपराधमा संलग्न भएको अभियोगमा यसअघि जेल समेत गइसकेका छन्।
स्रोतका अनुसार, अवैध रूपमा बनेका संरचनाहरू लाई छिट्टै हटाउने तयारी प्रशासनले गरिरहेको छ। साथै, यस प्रकरणमा संलग्नहरू माथि कानुनी कारवाहीको प्रक्रिया अघि बढाइएको छ।
आफ्नो प्रतिकृया दिनुहोस्